Бухоро вилоятининг Олот туманида яшовчи фуқаро ўз хонадонида ноқонуний ўқ-дори ва қурол-аслаҳа сақлаб келаётгани аниқланган. Бу ҳақда «Дарё»га хабар берган вилоят божхона бошқармаси матбуот хизматининг ёзишича, яширин сир хизмат ити томонидан фош қилинган.
Таъкидланишича, 2020 йилнинг 17 июль куни Бухоро вилояти божхона бошқармаси контрабандага қарши курашиш ва божхона аудити бўлими ҳамда ДХХ вилоят бошқармаси ходимлари билан ҳамкорликда Олот туманида тезкор тадбир ўтказилган.
Тадбир давомида барча аҳоли хонадонлари қатори тумандаги «Кирлишон» маҳалласида яшовчи фуқаро Б.Қ.дан ҳам дала шийпонида ноқонуний ашёлар бор ёки йўқлиги сўралган. У ўзида ва дала шийпонида ҳеч қандай ноқонуний ашёлар йўқлигини маълум қилган. Бироқ тадбирга жалб этилган «Олот» чегара божхона пости кичик инспектор кинологи Ф.Равшановга тегишли «Қора» лақабли хизмат ити безовталиги ходимларда шубҳа уйғотган.
Холислар иштирокида унинг дала шийпони ён атрофи кўздан кечирилганда ариқнинг ён томонида гавжум ўсган ўсимликлар орасига оқ рангли полиэтилен қоп яшириб қўйилгани аниқланган. Қопда икки стволли 12 калибрли, ствол рақами А64118, қўндоқ рақами А30675 бўлган «ИЖ-17» русумли ов қуроли ва 1 дона 16х73 рақамли гильза борлиги фош этилган.
Шунингдек, Б.Қ.нинг шийпони кўздан кечирилганда оғирлиги 8 грамм бўлган порох ва 1 дона 16х73 рақамли гильза ҳамда тахминан 150 грамм қўрғошин бўлаклари ҳам топилган. Улар ҳолатга ойдинлик киритилгунга қадар вақтинча сақловга олинган.
Ҳозирда мазкур иш юзасидан суриштирув олиб борилмоқда.
Изоҳ (0)