Andijon viloyatida qurolni saqlash va olib yurish qoidalarini buzgan 68 nafar fuqaro ma’muriy javobgarlikka tortildi, deya xabar berdi “Daryo” muxbiri Umidjon Mamarasulov.
Foto: Andijon viloyat IIB
Andijon viloyat ichki ishlar boshqarmasi axborot xizmatining ma’lumot berishicha, Prezidentning 2020-yil 8-apreldagi farmoni hamda Ichki ishlar vazirligining 2020-yil 25-iyundagi ko‘rsatmasiga asosan, fuqarolarga tegishli qurollarning saqlanishi va ulardan foydalanilish ustidan nazoratni kuchaytirish, turli noxush holatlarning oldini olish maqsadida “Qurol” maxsus profilaktika tadbiri o‘tkazilmoqda.
Foto: Andijon viloyat IIB
Yil boshidan ayni kunga qadar Patrul-post xizmati va jamoat tartibini saqlash boshqarmasi nazorat litsenziyalash faoliyati xodimlari tomonidan ovchilar jamiyati ishchi-xizmatchilari hamda jamoatchilik vakillarini jalb qilingan holda viloyatda 1502 ta ov quroliga ega shaxslar bilan profilaktik suhbat o‘tkazilgan.
Tekshiruvlar davomida qurolni saqlash va olib yurish qoidalarini buzgan 68 nafar fuqaroga nisbatan Ma’muriy javobgarlik to‘g‘risidagi kodeksning 221-moddasi (O‘qotar qurollarni ro‘yxatdan o‘tkazish, qayta ro‘yxatdan o‘tkazish muddatlarini yoki ularni hisobdan o‘tkazdirib qo‘yish qoidalarini buzish) bilan ma’muriy bayonnoma rasmiylashtirilgan. Ikki nafar fuqaro esa o‘ziga tegishli noqonuniy o‘qotar qurollarni ixtiyoriy ravishda IIBga topshirgan.
Eslatib o‘tamiz, mazkur modda bilan ayblangan fuqarolar bazaviy hisoblash miqdorining o‘ndan bir qismidan ikkidan bir qismigacha miqdorda jarimaga tortilishi mumkin.
