Olmaliqda kunlik ishga chiqayotgan 121 nafar fuqarodan 8 nafari haq to‘lanadigan jamoat ishlarida ishlashga rozi bo‘ldi. Qolganlar maoshi kam, deb rad etgan

Olmaliq shahar Aholi bandligiga ko‘maklashish markazi tomonidan kunlik ishga chiqib, daromad topayotgan fuqarolarning (mardikorlar) bandligini ta’minlash bo‘yicha bir qator tadbirlar olib borildi, deb xabar bermoqda Toshkent viloyati hokimligining axborot xizmati.

Xabarga ko‘ra, mardikor bozordagi 121 nafar fuqaroning har biri bilan suhbat o‘tkazilib, ularning oilaviy sharoiti o‘rganilgan. Suhbat natijasida jami 121 nafar fuqarodan 45 nafarining doimiy yashash manzili Piskent tumanida, 44 nafar fuqaroning doimiy yashash manzili Ohangaron tumanida, 21 nafar fuqaroning doimiy yashash manzili Olmaliq shahrida ekanligi aniqlangan. 11 nafar fuqaroning doimiy yashash manzili boshqa tumanlarda joylashgani oydinlashgan.

Ushbu fuqarolarga markaz tomonidan Techno continental MChJ, “Tia jahon” MChJ, Toshkent shahridagi Artel korxonasi, “Nurteks” MChJ va haq to‘lanadigan jamoat ishlari taklif etilgan.

Hokimlik axborot xizmatining qayd etishicha, fuqarolar taklif etilgan ish o‘rinlarining oylik maoshi kamligi, ushbu korxonalar tomonidan beriladigan oylik maoshni kunlik ishda ishlab, bir hafta ichida topishi mumkinligi vajidan rad javobini bergan.

Doimiy yashash manzili Olmaliq shahrida bo‘lgan 8 nafar fuqaro haq to‘lanadigan jamoat ishlarida ishlash istagini bildirib, 2020-yil 1-avgust sanasidan jamoat ishlariga qatnashishga rozilik bildirgan.

2020-yil 6-iyunda Xalqaro press-klubning Farg‘ona viloyatiga bag‘ishlangan sessiyasida bandlik va mehnat munosabatlari vaziri Nozim Husanov O‘zbekistondagi ishsizlik darajasi haqida berilgan savolga javob qaytargan va ishsizlar soni qariyb 2 millionga yaqinlashganini aytgandi.

2-iyulda O‘zbekistonda 2020-yilning Ikkinchi choragi yakunlariga ko‘ra, ishsizlik darajasi 15 foizgacha ko‘tarilgani xabar qilindi. Bir kun o‘tgach, Xalqaro mehnat tashkiloti (XMT)ning Global sammiti davomida Yevropa va O‘rta Osiyoda koronavirus pandemiyasining mehnat bozorlariga ta’siriga qarshi kurashish yo‘llari va kelajakdagi istiqbollarini muhokama qilingan va unda ishtirok etgan Bandlik va mehnat munosabatlari vaziri Nozim Husanov O‘zbekistonda ijtimoiy ahvoli va turmush sharoiti og‘irlashgan oilalarning bandligini ta’minlash orqali ularga daromad manbayi yaratishning vaqtinchalik tartibi joriy etilgani, vaqtincha bandlik bo‘yicha jamoat ishlari fondi mablag‘lari hisobidan 230 mingga yaqin ishsiz fuqarolar ish bilan ta’minlanganini bildirgandi.