Rossiyaning Podolsk shahrida o‘zbekistonliklar to‘rtinchi qavat balkonidan tushib ketgan bolakayni qutqarib qoldi. Bu haqda “Moskovskiy komsomolets” xabar qilgan.
“Podolskda mo‘jizaviy hodisa ro‘y berdi”, – deb yozmoqda nashr. Shahardagi ko‘p qavatli uylarning birida xo‘jalik ishida band bo‘lgan o‘zbekistonliklar to‘rtinchi qavatda 20 daqiqa osilib turgan bolakayni pastda choyshab bilan ushlab qoldi.
Bolaning 21 yoshli onasi bu vaqtda uyda uxlab yotgan va voqeadan keyin politsiya xodimlari yetib kelganida ayolning mast ekani ma’lum bo‘ldi.
Bolakayni qutqarib qolgan ishchilar Bekmurod Turdialiyev va Sherbek Soliyev bilan birga uyda yashovchi boshqa kishilar hamda 16 yoshli o‘smir bola ham bo‘lgan.
“Yigitlar maysa o‘rayotgandi, keyin menga telefon qilib, yuqori qavatda bolakay osilib turgani, oyi, oyi deb baqirayotganini aytishdi. Uchinchi qavatda yashovchi ayol choyshab olib keldi. Biz uni yoyib 20 daqiqa davomida osilib turgan bolani qutqarishga tayyorlanib turdik. Bolakayning qo‘llari charchagach, u quladi va choyshab ustiga tushdi. Biz besh kishi bo‘lib uni ushlab qoldik, 16 yoshli o‘smir ham bizga yordam berdi. Bolakay rosa baqirdi, oyisini chaqirdi, ammo ayol uning oldiga chiqqani yo‘q. Uni ushlab qolganimizda bola yerga tegmadi va jarohat olmadi”, – deydi Bekmurod Turdialiyev.
Bekmurod 10 yildan beri Podolskda yashaydi va shahardagi obodonlashtirish boshqarmasida ishlaydi. Nashr bergan ma’lumotga ko‘ra, u uch qiz va bir o‘g‘ilning otasi. Oila yanvarda O‘zbekistonga qaytgan, ota esa karantin sabab hozir bu yerda.
Bolakayning onasi 21 yoshli Natalyaning yana bir o‘g‘li bor, u bir yoshda. Qutqarib qolingan bolaning ismi Aleksandr, ukasiniki esa Maksim. Ayolning bolalariga, asosan, ularning 81 yoshli buvisi qaragan, ammo keksa onaxon ham kasalxonaga tushgach, bolalar deyarli qarovsiz qolib ketgan. Ayol pala-partish hayot kechiradi va bolalariga e’tibor bermaydi.
2019-yil dekabr oyida Sankt-Peterburg yaqinidagi Olgino qishlog‘ida ichida 50 nafarga yaqin yo‘lovchi bo‘lgan Dragon rusumidagi avtobus yo‘lda yonib ketgan va yo‘lovchilarni kelib chiqishi o‘zbekistonlik 43 yoshli erkak qutqarib qolgandi.