Prezident Shavkat Mirziyoyev 21-iyul kuni bir qator qonun hujjatlariga o‘zgartish va qo‘shimchalar kiritish to‘g‘risida qonun imzoladi, deb xabar beradi “Xalq so‘zi Online”. Hujjat Qonunchilik palatasi tomonidan 1-may kuni qabul qilingan, 19-iyunda esa Senat tomonidan ma’qullangan edi.
Unga ko‘ra, Ma’muriy javobgarlik to‘g‘risidagi kodeksning 17-1-moddasi quyidagi tarkibiy qism bilan to‘ldirildi:
“Transport vositasi haydovchisining qizil yoki ko‘k, qizil-ko‘k miltillovchi chirog‘ini yoqib hamda maxsus ovoz signali bilan kelayotgan tezkor va maxsus xizmat transport vositalariga yo‘l berishi asnosida ma’mumiy qoidabuzarlik sodir etgani maxsus avtomatlashtirilgan foto va video qayd etish texnika vositalari orqali qayd etilgan taqdirda, ma’muriy javobgarlikka sodir etilmagan deb hisoblanadi va ma’muriy ish kodeksning 271-moddasiga ko‘ra tugatiladi”.
Shunday qilib, agarda haydovchilar o‘t o‘chirish, tez yordam va boshqa maxsus xizmat mashinalariga yo‘l berish asnosida yo‘l harakati qoidalarini buzsa, javobgarlikka tortilmaydi.
Iyun oyida Senat raisi Tanzila Norboyeva so‘nggi ikki yil ichida 48 mingdan ortiq odam tezkor xizmatlarning vaqtida yetib kelmasligi oqibatida vafot etganini ma’lum qilgandi.
Avvalroq Toshkentda oxirgi 3 kunda tez yordamning vaqtida yetib bormagani sababli 43 kishi turli kasalliklar bilan vafot etgani to‘g‘risida xabar berilgandi.
Izoh (0)