Koronavirusdan himoyalanish uchun sarimsoqli damlama ichishni tavsiya etgan o‘zbekistonlik blogerda COVID-19 aniqlandi

O‘zbekistonlik interyer dizayneri va bloger Miraziz Ahmedov koronavirusga chalindi. Bu haqda u Facebook’dagi sahifasida ma’lum qildi.

Bloger dizaynerlik, din va psixologiya mavzularidagi postlari bilan mashhur. Koronavirus pandemiyasi boshlanganda bu kasallik haqida o‘z fikrlari bilan o‘rtoqlashgan.

Fevral oxirida qoldirgan postida koronavirus AQSh tomonidan ishlab chiqarilgani va ma’lum millatning geniga moslashtirilganini taxmin qilgandi. O‘zbekistonga esa bu virus kirmasligini shama qilgan. Sabab qilib, O‘zbekiston AQShning “jig‘iga tegmaganini” ta’kidlagandi.

“Mening taxminim, koronavirus Amerika tomonidan ishlab chiqarilgan genli virus. Ya’ni ma’lum bir millat geniga moslashtiriladigan. Har xil davlatga tarqatilishida siyosiy maqsadi bor… Asosan Xitoyni ‘burnini ishqalash’ uchun Erdo‘g‘on bilan kelishgan bo‘lishi mumkin. Chunki Xitoy yer yuzini egallab olish xavfi tug‘ilayotgan edi. Reja xitlanmasligi uchun har xil davlatlarga ham tarqatib qo‘yiladi. O‘zbekistonga kelmasmikan? O‘zbekiston Amerikani g‘ashiga tegmayapti-ku?!”, — deb yozgandi bloger.

Shuningdek, Miraziz Ahmedov koronavirus siyosiy o‘yin ekani va “siyosiy reja” bo‘yicha Yer yuzida bir milliard odam qolishi kerakligini aytgan. Bu virusdan sarimsoqli damlama bilan himoyalanishni maslahat bergan.

“Siyosiy rejaga bo‘yicha, koronavirus bo‘lmaydigan odam qolish kerak emas. Ya’ni ular Yer yuzida bir milliard odam qoldirishni rejalashgan.

Aslida koronavirusdan saqlanishning yo‘li juda oson. Buning uchun bir stakan suvga, 2 ta donacha chesnokni kesib, kechasi solib qo‘yasiz va ertalab och qoringa ichasiz. Oddiy, issiqmas, toza suvga tayyorlanadi. Sinalgan metod. Qo‘shimchasiga zanjabilli asal choy. Koronavirus bo‘lmagan odam qolmaydi deyishyapti, biz sababini qilib, immunitetni ko‘taraveramiz”, — deb yozadi u.

Bloger navbatdagi videosida virusdan davolanayotganini ma’lum qilgan. Uyda juda qiynalganini va ishxonadagilarga vasiyat qoldirganini ta’kidlab o‘tgan.

Videoda u Akfa Medline shifoxonasida davolanayotganini va bu yerga uning do‘stlari olib kelgani haqida aytgan. Uning ta’kidlashicha, shifoxonadagi ayrim tibbiyot xodimlari ketib qolgan. Hozirda oz sonli shifokorlar bemorlarga xizmat ko‘rsatayotganini ma’lum qilgan.

Bloger 10 kunlarda sog‘ayishidan umid qilgan.