Коронавирусдан ҳимояланиш учун саримсоқли дамлама ичишни тавсия этган ўзбекистонлик блогерда COVID-19 аниқланди

Ўзбекистонлик интерьер дизайнери ва блогер Миразиз Аҳмедов коронавирусга чалинди. Бу ҳақда у Facebook’даги саҳифасида маълум қилди.

Блогер дизайнерлик, дин ва психология мавзуларидаги постлари билан машҳур. Коронавирус пандемияси бошланганда бу касаллик ҳақида ўз фикрлари билан ўртоқлашган.

Февраль охирида қолдирган постида коронавирус АҚШ томонидан ишлаб чиқарилгани ва маълум миллатнинг генига мослаштирилганини тахмин қилганди. Ўзбекистонга эса бу вирус кирмаслигини шама қилган. Сабаб қилиб, Ўзбекистон АҚШнинг «жиғига тегмаганини» таъкидлаганди.

«Менинг тахминим, коронавирус Америка томонидан ишлаб чиқарилган генли вирус. Яъни маълум бир миллат генига мослаштириладиган. Ҳар хил давлатга тарқатилишида сиёсий мақсади бор… Асосан Хитойни ‘бурнини ишқалаш’ учун Эрдўғон билан келишган бўлиши мумкин. Чунки Хитой ер юзини эгаллаб олиш хавфи туғилаётган эди. Режа хитланмаслиги учун ҳар хил давлатларга ҳам тарқатиб қўйилади. Ўзбекистонга келмасмикан? Ўзбекистон Американи ғашига тегмаяпти-ку?!», — деб ёзганди блогер.

Шунингдек, Миразиз Аҳмедов коронавирус сиёсий ўйин экани ва «сиёсий режа» бўйича Ер юзида бир миллиард одам қолиши кераклигини айтган. Бу вирусдан саримсоқли дамлама билан ҳимояланишни маслаҳат берган.

«Сиёсий режага бўйича, коронавирус бўлмайдиган одам қолиш керак эмас. Яъни улар Ер юзида бир миллиард одам қолдиришни режалашган.

Аслида коронавирусдан сақланишнинг йўли жуда осон. Бунинг учун бир стакан сувга, 2 та донача чеснокни кесиб, кечаси солиб қўясиз ва эрталаб оч қоринга ичасиз. Оддий, иссиқмас, тоза сувга тайёрланади. Синалган метод. Қўшимчасига занжабилли асал чой. Коронавирус бўлмаган одам қолмайди дейишяпти, биз сабабини қилиб, иммунитетни кўтараверамиз», — деб ёзади у.

Блогер навбатдаги видеосида вирусдан даволанаётганини маълум қилган. Уйда жуда қийналганини ва ишхонадагиларга васият қолдирганини таъкидлаб ўтган.

Видеода у Akfa Medline шифохонасида даволанаётганини ва бу ерга унинг дўстлари олиб келгани ҳақида айтган. Унинг таъкидлашича, шифохонадаги айрим тиббиёт ходимлари кетиб қолган. Ҳозирда оз сонли шифокорлар беморларга хизмат кўрсатаётганини маълум қилган.

Блогер 10 кунларда соғайишидан умид қилган.