Ukraina Oliy Radasi ikkinchi o‘qishda mamlakatda o‘yin biznesini legallashtirish to‘g‘risidagi qonunni qabul qildi. Bu haqda Ukraina parlamentining rasmiy saytida xabar berilgan.
Qonun bilan azart o‘yinlar (ruletka, qarta o‘yinlari va o‘yin avtomatlari), shuningdek, bukmekerlik faoliyatini amalga oshirishga ruxsat beriladi. Kazinolarni to‘rt yoki besh yulduzli mehmonxonalarga va maxsus o‘yin zonalariga qurish mumkin; hozirda shu turdagi beshta zonani tashkil etish rejalashtirilmoqda.
Azart o‘yinlarga 21 yoshdan kichik bo‘lganlar qo‘yilmaydi. O‘yin biznesini Ukraina hukumatiga bo‘ysunuvchi maxsus komissiya nazorat qiladi.
Ukrainada o‘yin biznesiga 2009-yilda taqiq o‘rnatilgan. Uni legallashtirish bo‘yicha Oliy Radaga navbatdagi qonun loyihasini 2019-yilda “Xalq noibi” partiyasi deputati Oleg Marusyak kiritgan. Qonun loyihasiga berilgan izohda keltirilishicha, Ukrainada azart o‘yinlarga qo‘yilgan taqiqlar sabab 5 mingga yaqin o‘yin avtomatlari, 2 mingga yaqin qimorxona va kamida 20 ta yashirin kazino faoliyat ko‘rsatmoqda. Yanvar oyida Rada qonun loyihasini birinchi o‘qishga qabul qilgandi.
Eslatib o‘tamiz, 2019-yil may oyida esa O‘zbekiston Turizmni rivojlantirish davlat qo‘mitasi Qoraqalpog‘istonda maxsus o‘yin zonasini tashkil etish loyihasini qo‘llab-quvvatlashini bildirgan, ayni vaqtda ushbu zona xorijliklar uchun xizmat qilishini ma’lum qilgan edi.
Ma’lumot uchun, Qoraqalpog‘istonda Las-Vegasdagi kabi azart o‘yin zonalari tashkil etilishi mumkinligiga dastlab Prezident Shavkat Mirziyoyev, Oliy Majlisga 2018-yilgi Murojaatnomasi vaqtida ishora qilgandi.
Izoh (0)