O‘zbekistonda shu vaqtgacha 328 nafar bolada koronavirus aniqlangan. Bu haqda sog‘liqni saqlash vaziri o‘rinbosari Elmira Bositxonova AOKA huzurida o‘tkazilgan matbuot anjumanida ma’lum qildi.
“Bugungi kungacha 45 mingdan ortiq bolalarimiz karantinda bo‘ldi. 328 nafar bola esa afsuski, koronavirus bilan kasallandi. Mana vaziyat qanday jiddiy”, — dedi Bositxonova.
Avvalroq Bositxonova karantin davrida 208 nafar homilador ayolda koronavirus aniqlangani haqida ma’lum qildi.
Eslatib o‘tamiz, 10-iyuldan O‘zbekistonda karantin choralari kuchaytirilmoqda. Unga ko‘ra, tashkiliy-huquqiy va mulkchilik shaklidan qat’i nazar, maktabgacha ta’lim tashkilotlari, o‘quv kurslari va har qanday to‘garaklar faoliyati ham to‘xtatilishi belgilangan.
Ma’lumot uchun, O‘zbekistonda 8-iyul soat 10:00 holatiga ko‘ra, koronavirus bilan kasallanganlarning umumiy soni 10 982 kishiga yetdi. Ulardan 42 nafari vafot etgan, 6811 nafari esa sog‘aydi.
Izoh (0)