Sardoba falokatidan jabr ko‘rgan ayol 2 farzandi bilan ko‘chada qolgani va na va’da qilingan pul, na uyni “remont” qilib berilganidan shikoyat qilib, murojaat yo‘lladi.

Ayolning so‘zlariga ko‘ra, u ikki nafar farzandi bilan ko‘chada qolgan va Prezident tomonidan Sardoba fojiasidan jabr ko‘rgan aholiga ajratilishi kerak bo‘lgan 40 million so‘mni ololmay kelyapti.

“Biz yashaydigan hovlini suv yuvib ketdi. Necha millionlik narsalarimizni yo‘qotdik, maishiy texnika, mollarimiz, hamma narsamizni yo‘qotdik. Viloyat hokimligiga to‘rt marotaba keldim, tuman hokimligiga esa 1,5 oy qatnadim, lekin natija yo‘q. Pul yo‘q deyishdi, ‘insofsiz’ deyishdi”, — deya murojaat qiladi ayol.

Ayolning ta’kidlashicha, u kun davomida hokimlik binosi qarshisida farzandlari bilan kutib o‘tirgan bo‘lsa-da, hokimlik vakillari “pul yo‘q, pul tugadi” degan bahonalar bilan ajratilgan pullarni bermagan.

“O‘sha beradigan 40 million puli kerak emas. Er-xotin mehnat qilib ko‘targan uyimizni joyiga qo‘yib berishsin. Sarson-sargardonlikdan Allohning o‘zi asrasin barchani”, — deya yig‘laydi murojaatchi.

Eslatib o‘tamiz, 1-may kuni soat 05:55 da Sirdaryo viloyatida joylashgan Sardoba suv ombori to‘g‘onining 6-piket devorida suv chiqishi yuzaga kelgandi. Suv toshqini oqibatida 4435 ta xonadon talafot ko‘rgan. Ulardan 2390 tasi yaroqsiz holga kelgan, 2045 tasi esa ta’mirtalab holatda edi. Iyun oyi oxirlaridagi ma’lumotlarga ko‘ra, falokatdan zarar ko‘rgan tumandagi 1828 ta turar joy ta’mirlangan, 32 ta ko‘prik qayta tiklangan.

Prezident Shavkat Mirziyoyev 15-may kuni Sardoba tumaniga amalga oshirgan tashrifi davomida mahalliy aholi vakillari bilan uchrashib, falokatdan jabr ko‘rgan aholiga 40 million so‘mlik sertifikatlarni topshirgan edi. 2-iyun holati bo‘yicha Sardoba falokatidan jabrlangan 4025 kishi Prezident tomonidan berilgan 40 million so‘mni olgan, qariyb 68 ming kishi o‘z uyiga qaytgan.