LG kompaniyasi 2021-yilda Project B shartli nomi ostida displeyi yig‘ilgan holda korpus ichiga yashirinadigan smartfonni taqdim etadi, deb yozadi TheElec.
Ma’lum bo‘lishicha, kompaniya o‘zining Janubiy Koreyadagi zavodida yig‘iluvchi displeyga ega smartfon prototipini ishlab chiqarishni yo‘lga qo‘ygan. Project B yordamida kompaniya premium va innovatsion smartfonlar ishlab chiqaruvchi maqomini qaytarib olish niyatida. LG uchun mobil telefonlar biznesi ketma-ket 5 yildan buyon zarar keltirmoqda.
Smartfon “rulon” nomini olgan bo‘lib, uning displeyi zarurat tug‘ilganida korpusdan chiqarib olinadi. Buning uchun Xitoyning BOE kompaniyasi ishlab chiqaruvchi egiluvchan OLED-displeyidan foydalaniladi.
Manbalarning so‘zlariga ko‘ra, yig‘iluvchi displeyga ega smartfonni ishlab chiqarish, buklanuvchi ekranga ega qurilmani ishlab chiqarishdan ko‘ra qiyinroq. Displey ochilganida uni qo‘llab-quvvatlovchi konstruksiyani o‘ylab topish ham kerak.
Bunga qadar Xitoyning TCL kompaniyasi prototiplaridan birida shu kabi g‘oyani ilgari surgan edi — smartfon odatdagi holatda standart ko‘rinishga ega, zarurat tug‘ilganida esa displeyni yonga tortib chiqarish mumkin.
LG’ning smartfon-ruloni 2021-yilga borib bozorlarga paydo bo‘lishi kutilmoqda. Shuningdek, kompaniya 2021-yilning birinchi yarim yilligida klassik premium flagmanni taqdim etishni rejalashtirmoqda, biroq hozircha u haqida ma’lumotlar oshkor etilmagan.
Izoh (0)