Инсон ҳуқуқлари бўйича миллий марказ бўлим бошлиғи Ойбек Аҳматов Халқаро пресс-клубнинг 1 июль куни бўлиб ўтган навбатдаги сессиясида Андижонда фуқаронинг ички ишлар ходимлари томонидан қийноқларга солиниши ҳолатидан келиб чиқиб ўз таклифларини берди. Бу ҳақда «Дарё» мухбири Мусулмонбек Иброҳимов хабар бермоқда.
Ойбек Аҳматов биринчи галда, мамлакатдаги бундай ҳолатлар фавқулодда ҳолат сифатида қабул қилиниши зарурати борлигини билдирди.
«Иккинчидан, бундан буён бу каби ҳар битта ҳолатнинг келиб чиқиш сабабларини чуқур ўрганиш ва туб илдизларигача етиб боришни йўлга қўйиш керак. Учинчидан, Олий судга Жиноят кодексининг 235-моддасини (Қийноққа солиш ва бошқа шафқатсиз, ғайриинсоний ёки қадр-қимматни камситувчи муомала ҳамда жазо турларини қўллаш) одил судлов жараёнида қўллаш амалиётини умумлаштириш тавсия этилади», — деди миллий марказ вакили Аҳматов.
Унинг қўшимча қилишича, инсон ҳуқуқлари, эркинликлари ва қонуний манфаатларига бевосита дахлдор соҳаларда ишлайдиган ҳамда хизмат вазифасини олиб борадиган барча тоифадаги кадрларни инсон ҳуқуқлари соҳаси бўйича ўқитиш шарт.
Мавзуга доир: Ўзбекистонда ҳуқуқ-тартибот идоралари раҳбарлари инсон қадр-қимматини ҳурмат қилиш бўйича ўқитилади
Изоҳ (0)