Sardoba viloyati hokimligi ijtimoiy tarmoqlarda “Sardoba falokati ortidan uysiz qolganlar quruq va’dalardan toqati toq bo‘lganini aytmoqda” sarlavhasi ostida tarqalgan xabar yuzasidan o‘rganish ishlarini olib bordi.
Ma’lum bo‘lishicha, keng muhokamalarga sabab bo‘lgan ushbu xabar Sardoba tumani “Do‘stlik” mahallasidagi suv toshqinidan talafot ko‘rgan 28 ta xonadon egalari tomonidan yo‘llangan.
Respublika maxsus ishchi guruhi xulosasi bilan “Do‘stlik” mahallasidagi 61 ta beton panelli uylar qayta ta’mirlanmoqda, ta’mirlash ishlariga Qoraqalpog‘iston Respublikasi mas’ul etib biriktirilgan. 21-may kunidagi “Qishloq qurilish loyiha” MChJning Sirdaryo viloyati Sardoba tumani “Do‘stlik” MFYdagi uy-joylarning holati to‘g‘risida taqdim etgan texnik xulosasiga ko‘ra, ushbu mahalladagi 90 ta turar joydan 28 tasi o‘tgan asrning 70-yillarida qad rostlagan bo‘lib, massivning yer osti suvlari sathining yer yuzasiga yaqin bo‘lgan past joyda qurilgan.
Suv toshqinidan keyin ushbu 28 ta turar joylarning yuk ko‘tarish konstruksiyalari suv ostida qolib, suvni shimib olishi natijasida ikkita uy qulab tushgan. Qolgan turar joylarning konstruksiyalarida yoriqlar va o‘yilishlar, armatura simlarining ochilishi, zanglash va sinish holatlari paydo bo‘lgan. Yig‘ma devor temir beton panellarining ayrim qismlari buzilgan, cho‘kkan, deformatsiya alomatlari bor, plita devorlari vertikaldan og‘ishganligi aniqlangan.
Mazkur xonadon egalariga tomorqalari o‘zlarida qoldirilishi bilan birga, 400 metr uzoqlikda barcha qulayliklarga ega zamonaviy loyihalar asosida qurilayotgan 1480 ta xonadonga mo‘ljallangan, 37 ta ko‘p qavatli uy-joylardan 3 xonali xonadonlar 2020-yilning 1-sentabr kuniga qadar tugallanib, ajratiladi. Ta’kidlanishicha, hozirda mazkur 37 ta ko‘p qavatli uylarning qurilishi ishlari jadal sur’atlarda ketmoqda.
Shu munosabat bilan 24-iyun kuni murojaat yo‘llagan fuqarolar hamda viloyat, tuman va mas’ul mutasaddilari ishtirokidagi “Do‘stlik” MFY hududida joylashgan qurilish shtabida brifing bo‘lib o‘tgan. Brifing davomida ushbu xonadon egalarining talablari eshitilgan. Mutaxassislar tomonidan 28 ta turar joy binolarining bugungi kundagi texnik holati bo‘yicha, mutlaqo ta’mirlab bo‘lmasligi, butunlay yaroqsiz ahvolga kelib qolganligi, seysmik jihatdan xavfli ekanligi aniq misollar bilan tushuntirib o‘tilgan.
Tahlillarga ko‘ra, mazkur uy-joylarning qayta ta’miri uchun o‘rtacha hisobda 2 milliard 175 million so‘mni (1 ta uy uchun 70-80 million so‘m to‘g‘ri keladi) tashkil etadigan bo‘lsa, xonadon egalariga berilishi nazarda tutilayotgan 1 ta uyning narxi o‘rta hisobda 450 million so‘mni, 28 ta xonadonniki esa 12,6 milliard so‘mni tashkil etadi.
Eslatib o‘tamiz, 1-may kuni soat 05:55 da Sirdaryo viloyatida joylashgan Sardoba suv ombori to‘g‘onining 6-piket devorida suv chiqishi yuzaga kelgandi. Favqulodda vaziyat sababli Sardoba, Oqoltin, Mirzaobod tumanlaridagi 24 ta mahalladan 90 mingga yaqin fuqaro zudlik bilan xavfsiz hududga evakuatsiya qilingan. Suv toshqini oqibatida 4435 ta xonadon talafot ko‘rgan. Ulardan 2390 tasi yaroqsiz holga kelgan, 2045 tasi esa ta’mirtalab holatda. Sardoba tumani “Do‘stlik” mahallasida 37 ta 1480 xonadonli; Mirzaobod tumani “Haqiqat” mahallasida 20 ta 800 xonadonli va “Navbahor” mahallasida 9 ta 360 xonadonli ko‘p qavatli turar joy qurilish ishlari boshlangan.
Izoh (0)