Jahonning birinchi raqamli raketkachisi Novak Jokovich koronavirusga yo‘liqdi.
Xorvatiyada bo‘lib o‘tgan musobaqadan so‘ng serbiyalik tennischining COVID-19 tahlili ijobiy natija bergan. Shuningdek, uning turmush o‘rtog‘i Yelena Jokovichda ham infeksiya borligi ma’lum bo‘lgan.
Koronavirusga chalinganini bilgan Jokovich xavfsizlik qoidalariga rioya qilmasdan musobaqalar seriyasini tashkil qilgani uchun uzr so‘radi.
“So‘nggi oylarda biz tashkil qilgan barcha narsa chin yurakdan va yaxshi niyatlar bilan qilingandi. Adria Tour musobaqasi faoliyatini boshlayotgan va allaqachon tanilishga ulgurgan janubi-sharqiy Yevropadan bo‘lgan o‘yinchilar uchun mo‘ljallangan bo‘lib, koronavirus tufayli rasmiy musobaqalar bekor qilingani sabab tashkil etilandi.
Musobaqadan tushgan barcha mablag‘ muhtoj insonlarga berilishi rejalashtirilgandi. Biz musobaqani epidemiya pasaygan vaqtda tashkil qilgandik va barcha zaruriy qoidalarga amal qilayotganimizga ishongandik.
Afsuski, virus hali hech qayerga ketmagan — bu bizni yashashga va muammolarni hal qilishga o‘rgatadigan yangi reallik. Umid qilamanki, vaqt o‘tishi bilan vaziyat o‘zgaradi va biz odatiy hayot tarziga qaytamiz.
Har bir koronavirusga chalinish holati uchun kechirim so‘rayman. U o‘zidan asoratlar qoldirmasligi va barcha tezda tuzalib ketishiga umid bildirib qolaman.
Men 14 kun mobaynida izolyatsiyada bo‘laman, 5 kundan keyin esa qayta test topshiraman”, — deydi Jokovoich.
Ma’lumot uchun, ushbu musobaqada tennischi Grigor Dimitrov va uning murabbiyi, Viktor Troitski va uning homilador ayoli, shuningdek, Borna Chorich hamda Jokovichning jismoniy tayyorgarlik bo‘yicha murabbiyi virusga yo‘liqqan.
Avvalroq musobaqa ishirikochilarida koronavirus aniqlangani sabab, ular bilan muloqotda bo‘lganlardan tahlil olish boshlangan. Biroq Jokovich o‘zini yaxshi his qilayotganini aytib koronavirusga test topshirishdan bosh tortgan va Serbiyaga jo‘nab ketgandi.
Izoh (0)