Qozog‘istonning Sayram tumanidan imom-noib sifatida qilgan ma’ruza va darslari bilan tanilgan o‘zbekistonlik Ma’murjon Hayitmetov 17-iyun kuni Qozog‘iston Milliy xavfsizlik qo‘mitasi tomonidan hibsga olindi, deb xabar beradi BBC.
Ta’kidlanishicha, Hayitmetovga bundan 6 yil oldin nasroniylik dini haqida qilgan ma’ruzasi bo‘yicha diniy adovat qo‘zg‘ash aybi qo‘yilmoqda.
Ma’lumotlarga ko‘ra, Hayitmetov 17-iyun kuni Sayramdagi MXQ idorasiga chaqirtirilgan. Mashinasida idoraga ketayotgan vaqtida uni yo‘lda niqobli MXQ xodimlari to‘xtatib, ommaning ko‘z oldida ushlab olib ketgan. Domlani qo‘lga olish jarayoni ijtimoiy tarmoqlarda tarqalgan video va suratlarda aks etgan. 44 yoshli Hayitmetov Qozog‘iston Jinoyat kodeksining 174-moddasi 2-bandi bilan tergov qilinmoqda. Ushbu modda ijtimoiy, milliy, urug‘ga oid, irqiy, tabaqaviy yoki diniy adovat qo‘zg‘ash jinoyati haqida.
2014-yilda Sayram tumanidagi “Jalol ota” masjidida o‘tgan darsi bo‘yicha Ma’murjon Hayitmetovga o‘z xizmat mansabidan foydalangan holda fuqarolarning milliy sha’nini tahqirlab, diniy adovat qo‘zg‘ash aybi qo‘yilmoqda. Mazkur modda bo‘yicha ayblangan shaxs 5 yildan 10 yilgacha ozodlikdan mahrum qilinishi mumkin.
Qayd etilishicha, Ma’murjon Hayitmetov hibsga olinishi arafasida Mankent qishlog‘i va atrofdagi qishloqlarda yashagan yana 3-4 yigit qo‘lga olingan. Milliy xavfsizlik qo‘mitasi tomonidan tasvirga tushirilgan, ularni qo‘lga olish jarayoni aks etgan video ham ijtimoiy tarmoqlarga sizdirilgan.
“Bu yoshlarga diniy adovat qo‘zg‘ashdan tashqari terrorizm bilan bog‘liq videomateriallar tarqatgan, degan ayb ham qo‘yilgan. Bizning tushunishimizcha, ushbu bolalarni Ma’murjon domlaning videolaridan ta’sirlangan, degan ma’no bilan bog‘lashmoqchi, shekilli”, — deyiladi xabarda.
Yaqinlari Ma’murjon Hayitmetovni himoya qilish uchun advokat yollagan. Milliy xavfsizlik qo‘mitasi xodimlari Hayitmetovni yaqinlaridan tergov vaqtida idora atrofida to‘plamaslikni so‘ragan.
Izoh (0)