18-iyun, juma kuni Osiyo futbol konfederatsiyasida (OFK) shu yilning oktabr oyida O‘zbekistonda o‘tkaziladigan U-19 yoshlar o‘rtasidagi Osiyo chempionati final bosqichiga qur’a tashlash marosimi bo‘lib o‘tdi.
Mazkur Osiyo chempionati bahslariga to‘rt stadion — Toshkentdagi “Bunyodkor”, “Lokomotiv”, Olmaliqdagi OKMK hamda Namangandagi “Markaziy” stadionlari mezbonlik qiladi.
Professional futbol ligasi (PFL) ishchi rejasiga ko‘ra, Superliganing 19 hamda 20-tur bahslari Osiyo chempionati uchrashuvlari vaqtiga to‘g‘ri keladi. Shu bois PFL mazkur tur uchrashuvlari o‘tkazilishi bilan bog‘liq ayrim o‘zgarishlarni ma’lum qildi.
“19-turdagi OKMK — “Mash’al” hamda 20-turdagi “Bunyodkor” — “Andijon” uchrashuvlari, “Bunyodkor” hamda OKMK stadionlari Osiyo chempionati bahslari uchun band ekanligi hisobga olinib, ushbu turda mezbonlar o‘zaro joy almashadi. Tabiiyki, 6-turdagi “Mash’al” — OKMK hamda 7-turdagi “Andijon” — “Bunyodkor” uchrashuvlari mezbonlari ham almashadi.
Shuningdek, 6-tur doirasidagi “Surxon” — “Qo‘qon-1912” uchrashuvi Termiz shahridagi hozirgi epidemiologik vaziyat tufayli Qo‘qon shahriga ko‘chirildi. Jamoalarning ikkinchi davra uchrashuviga esa, tabiiyki Termiz mezbonlik qiladi.
Shuni ta’kidlash lozim, PFL ushbu mavsum taqvimi ishchi rejasini ishlab chiqqan. Ushbu taqvim terma jamoalar hamda klublar ishtirok etadigan barcha musobaqalar inobatga olinib tuzib chiqilgan bo‘lib, OFK tomonidan Chempionlar Ligasi bahslari taqvimi rasman tasdiqlansa e’lon qilinadi”, — deyiladi xabarda.
4-turdan keyin turnir jadvalini 10 ochko to‘plagan “Nasaf” boshqarmoqda. Kuchli uchlikdan esa poytaxtning ikki klubi — “Paxtakor” va “Bunyodkor” jamoalari (9 ochko) joy olgan. 5-tur o‘yinlari 19—21-iyun kunlari bo‘lib o‘tadi.Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)