18 июнь, жума куни Осиё футбол конфедерациясида (ОФК) шу йилнинг октябрь ойида Ўзбекистонда ўтказиладиган U-19 ёшлар ўртасидаги Осиё чемпионати финал босқичига қуръа ташлаш маросими бўлиб ўтди.
Мазкур Осиё чемпионати баҳсларига тўрт стадион — Тошкентдаги «Бунёдкор», «Локомотив», Олмалиқдаги ОКМК ҳамда Намангандаги «Марказий» стадионлари мезбонлик қилади.
Профессионал футбол лигаси (ПФЛ) ишчи режасига кўра, Суперлиганинг 19 ҳамда 20-тур баҳслари Осиё чемпионати учрашувлари вақтига тўғри келади. Шу боис ПФЛ мазкур тур учрашувлари ўтказилиши билан боғлиқ айрим ўзгаришларни маълум қилди.
«19-турдаги ОКМК — «Машъал» ҳамда 20-турдаги «Бунёдкор» — «Андижон» учрашувлари, «Бунёдкор» ҳамда ОКМК стадионлари Осиё чемпионати баҳслари учун банд эканлиги ҳисобга олиниб, ушбу турда мезбонлар ўзаро жой алмашади. Табиийки, 6-турдаги «Машъал» — ОКМК ҳамда 7-турдаги «Андижон» — «Бунёдкор» учрашувлари мезбонлари ҳам алмашади.
Шунингдек, 6-тур доирасидаги «Сурхон» — «Қўқон-1912» учрашуви Термиз шаҳридаги ҳозирги эпидемиологик вазият туфайли Қўқон шаҳрига кўчирилди. Жамоаларнинг иккинчи давра учрашувига эса, табиийки Термиз мезбонлик қилади.
Шуни таъкидлаш лозим, ПФЛ ушбу мавсум тақвими ишчи режасини ишлаб чиққан. Ушбу тақвим терма жамоалар ҳамда клублар иштирок этадиган барча мусобақалар инобатга олиниб тузиб чиқилган бўлиб, ОФК томонидан Чемпионлар Лигаси баҳслари тақвими расман тасдиқланса эълон қилинади», — дейилади хабарда.
4-турдан кейин турнир жадвалини 10 очко тўплаган «Насаф» бошқармоқда. Кучли учликдан эса пойтахтнинг икки клуби — «Пахтакор» ва «Бунёдкор» жамоалари (9 очко) жой олган. 5-тур ўйинлари 19—21 июнь кунлари бўлиб ўтади.Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)