“Titanik” muvaffaqiyatidan keyin film yulduzi Billi Zeynning taqdiri qanday kechdi?

Rejissor Jeyms Kemeronning “Titanik” filmida Kel Xokli roli bilan mashhur aktyor Billi Zeyn qahramonini gavdalantirganida 30 yoshda bo‘lgan.

Uning qoyilmaqom ijrosi 1997-yilda MTV e’tirofiga sazovor bo‘libgina qolmay, “Yilning eng chiroyli erkaklari” reytingidan o‘rin olgan.

Zeyn filmlar arsenali haqida gap ketganda karyerasining boshlanishini ko‘pchilik “Titanik” bilan bog‘laydi. Aslida esa u ilk bor 1985-yilda suratga olingan “Kelajakka qaytib” filmida Match ismli yigit rolida namoyon bo‘lgan. Shundan keyin “Snayper”, “Megavil” “Orlando” va boshqa bir qancha filmlarda suratga tushgan. “Titanik” dan keyin esa uni, asosan, salbiy qahramon roliga taklif eta boshlashgan.

Aktyorning o‘zi bunday takliflardan keyin jurnalistlarga bergan intervyusida ko‘rinishi salbiy qahramonga mos tushgani bilan hayotda unday emasligi, munosabat va his-tuyg‘ular u uchun muhimligini ta’kidlagan. Rejissorlarni esa Billining nimani his qilishi emas, qiyofasi rolga qanchalik mos tushishi ko‘proq qiziqtirgan.

Zeynning shaxsiy hayotida ayollar ko‘p bo‘lgan. 1995-yilgacha Liza Kollinz bilan er-xotin bo‘lgan aktyor keyinchalik aktrisa Leonor Varela, undan so‘ngra Kelli Bruk bilan uchrashgan. Shunga qaramay, model Kendis Nayl bilan jiddiy munosabatlarni boshlagan va hozirda juftlikning ikki nafar farzandi bor.

Tomoshabinlar xotirasida kelishgan aktyor sifatida muhrlangan Billining tashqi ko‘rinishi yillar o‘tib hamma singari o‘zgargan. Uning suratlariga nazar tashlab, yuziga yoshiga xos ajin tushgani, sochlari to‘kilgani va vazni ortganini ko‘rish mumkin. Asosiysi esa ko‘rinishi qanchalik o‘zgarmasin iste’dodi hali ham o‘sha-o‘sha.