«Титаник» муваффақиятидан кейин фильм юлдузи Билли Зейннинг тақдири қандай кечди?

Режиссёр Жеймс Кэмероннинг «Титаник» фильмида Кэл Хокли роли билан машҳур актёр Билли Зейн қаҳрамонини гавдалантирганида 30 ёшда бўлган.

Унинг қойилмақом ижроси 1997 йилда МТV эътирофига сазовор бўлибгина қолмай, «Йилнинг энг чиройли эркаклари» рейтингидан ўрин олган.

Зейн фильмлар арсенали ҳақида гап кетганда карьерасининг бошланишини кўпчилик «Титаник» билан боғлайди. Аслида эса у илк бор 1985 йилда суратга олинган «Келажакка қайтиб» фильмида Матч исмли йигит ролида намоён бўлган. Шундан кейин «Снайпер», «Мегавил» «Орландо» ва бошқа бир қанча фильмларда суратга тушган. «Титаник»дан кейин эса уни, асосан, салбий қаҳрамон ролига таклиф эта бошлашган.

Актёрнинг ўзи бундай таклифлардан кейин журналистларга берган интервьюсида кўриниши салбий қаҳрамонга мос тушгани билан ҳаётда ундай эмаслиги, муносабат ва ҳис-туйғулар у учун муҳимлигини таъкидлаган. Режиссёрларни эса Биллининг нимани ҳис қилиши эмас, қиёфаси ролга қанчалик мос тушиши кўпроқ қизиқтирган.

Зейннинг шахсий ҳаётида аёллар кўп бўлган. 1995 йилгача Лиза Коллинз билан эр-хотин бўлган актёр кейинчалик актриса Леонор Варела, ундан сўнгра Келли Брук билан учрашган. Шунга қарамай, модель Кендис Найл билан жиддий муносабатларни бошлаган ва ҳозирда жуфтликнинг икки нафар фарзанди бор.

Томошабинлар хотирасида келишган актёр сифатида муҳрланган Биллининг ташқи кўриниши йиллар ўтиб ҳамма сингари ўзгарган. Унинг суратларига назар ташлаб, юзига ёшига хос ажин тушгани, сочлари тўкилгани ва вазни ортганини кўриш мумкин. Асосийси эса кўриниши қанчалик ўзгармасин истеъдоди ҳали ҳам ўша-ўша.