Samarqandda aza marosimi chog‘ida koronavirus yuqishi qayd etildi

Samarqand viloyatida aza marosimi chog‘ida koronavirus yuqishi qayd etildi. Bu haqda Samarqand viloyati hokimi o‘rinbosari Rustam Qobilov ishtirokida o‘tkazilgan onlayn brifingda ma’lum qilindi.

“Keyingi besh kunda Samarqandda koronavirus yuqishi bilan bog‘liq 17 ta holat aniqlangan bo‘lib, 7 ta holatda kasallik aholi orasida qayd etilgan”, — dedi Rustam Qobilov.

“Samarqand tumanida aza marosimida qayd etilgan holat sababli aholidan aza marosimlarida belgilangan karantin qoidalariga qati’y rioya qilish so‘raldi”, — deydi viloyat hokimi o‘rinbosari Rustam Qobilov.

Rustam Qobilov Samarqand tumanidagi aza marosimi qachon bo‘lgani va unda necha kishi koronavirusni yuqtirib olganiga aniqlik kiritmagan. SSV Samarqand tumanida 16-iyun kuni aholi orasida koronavirus aniqlangani haqida xabar bergandi. Samarqand tumanida yashovchi nafaqadagi fuqaro onkologiya kasalligi sababli shifoxonaga yotish uchun namuna topshirganda unda virus aniqlangan.

Oxirgi 5 kunda aholi orasida qayd etilgan holatlar Samarqandning boshqa shahar va tumanlarida kuzatilgan. Jumladan:

• 12-iyun kuni Urgut tumanida yashovchi ikki fuqaroda;
• 15-iyun kuni Toyloq tumani “Charog‘bon” MFYdagi avtomashinalarni ta’mirlash ustasida (tana harorati ko‘tarilganligi sababli namuna olingan), “Hamkorbank”ning Urgut filiali xodimida, ushbu tumanda qandli diabet kasalligi bo‘yicha davolanishga yo‘llanma olish uchun namuna olingan bemorda;
• 16-iyun kuni Samarqand shahridagi 24-maktab farroshi ko‘krak bezi kasalligi bo‘yicha namuna topshirganda koronavirus yuqtirib olgani ma’lum bo‘lgan.

Hozirda Samarqand viloyatida koronavirus yuqtirib olish bilan bog‘liq 392 ta holat qayd etilgan bo‘lib, bemorlarning 368 nafari (94 foizi) sog‘aygan. Ikki nafar (13-may kuni O‘. ismli ikkinchi guruh nogironi o‘tkir nafas va yurak qon-tomir yetishmovchiligidan hamda 26-may kuni 63 yoshli bemor o‘tkir nafas va yurak qon-tomir yetishmovchiligidan) bemor koronavirus asoratlaridan vafot etgan.