Ijtimoiy tarmoqlarda Toshkent viloyati markazi bo‘lgan Nurafshon shahri hokimi Qahramon Hakimovning tug‘ilgan kuniga atab tayyorlangani aytilgan, bir guruh yigitlar tomonidan kuylangan qo‘shiq tarqalgani haqida xabar berilgandi. Bu qo‘shiq ijtimoiy tarmoqlarda muhokamalarga sabab bo‘ldi. Toshkent viloyati hokimligi axborot xizmati va Nurafshon shahri hokimining o‘zi mazkur holatga izoh berdi.
Viloyat hokimligining ma’lum qilishicha, qo‘shiq shahar hokimligi axborot xizmati va madaniyat bo‘limi hamkorligida hududda amalga oshirilayotgan ishlarga oid videolavhalarni qo‘shib tayyorlangan. Rolik shaklidagi qo‘shiq klipi Nurafshon shahri hokimligining Telegram’dagi rasmiy kanalida e’lon qilingan.
Ta’kidlanishicha, hech kim bilan maslahatlashmay, rahbarga xush yoqish istagida tayyorlangan, shaxsga sig‘inish alomatlari yaqqol sezilib turgan bunday qo‘shiqni ijro etgan, rolik tayyorlagan va e’lon qilgan “ijodiy jamoa” tegishli tartibda ogohlantirildi. “Vaziyat keng miqyosda muhokama qilina boshlagach, davlat xizmatchisi sha’niga, nufuziga to‘g‘ri kelmaydigan ish qilganini anglagan shahar madaniyat bo‘limi, axborot xizmati rahbari ishdan bo‘shash haqida ariza yozdi”, — deyiladi viloyat hokimligining bayonotida.
Ma’lum qilinishicha, ayni paytda mehnat qonunchiligida belgilangan tartibda, karantin davri uchun Respublika komissiyasi e’lon qilgan me’yorlardan kelib chiqib, bu xodimlar bilan mehnat shartnomasini bekor qilish yoki boshqa intizomiy jazo belgilash bo‘yicha yakuniy qarorga kelinmoqda.
Viloyat hokimligi tomonidan ta’kidlanishicha, Nurafshon shahri hokimi Qahramon Hakimovning bunday ijodkorona “tuhfa” tayyorlanayotganidan xabari bo‘lmagan. Rolikni tayyorlagan jamoa uni hokimga uning tug‘ilgan kunida ko‘rsatgan. “Qahramon Hakimov ularga e’tibor uchun minnatdorlik bildirib, bunday ishlar bilan shug‘ullanmaslikni, materialni biron joyda e’lon qilmaslikni so‘ragan”, — deyiladi bayonotda.
Hokimlikning qayd etishicha, shahar hokimini qo‘shiq va klip bilan tabriklash fikri dastlab shahar madaniyat bo‘limi rahbari Bobur Abduqodirov tomonidan bildirilgan, shoir Ma’murjon Bozoraliyev so‘z yozib bergan, axborot xizmati rahbari Ravshan Mirzaqulov turli davrlarda olingan arxiv kadrlarni qo‘shib klip tayyorlagan. “Bir guruh faollar yaxshi niyatda, bajarayotgan ishlari san’at nuqtayi nazaridan, shuningdek, axborot siyosati, etikaga ko‘ra, mutlaqo noto‘g‘ri ekanini chuqur anglamasdan shu ishga qo‘l urgan”, — deyiladi hokimlik izohida.
Shuningdek, Nurafshon shahri hokimi Qahramon Hakimov ham mazkur vaziyatga izoh bergan.
Kecha va bugun internetda bunday qo‘shtirnoq ichidagi “qahramon”ga aylanib qolganimdan xalqimiz, jurnalistlarimiz va rahbariyat oldida nihoyatda xijolatdaman. Shunday lavha tayyorlab, menga ko‘rsatishganda, e’tibor uchun ularga minnatdorlik bildirib, lavhani tarqatmaslikni, boshqa bunaqa ishlar bilan shug‘ullanmaslikni qat’iy tayinlagan edim. Afsuski, lavha tarqalib ketibdi.Dangalini aytganda, menga shu kerak edimi? Mutlaqo yo‘q. Men bir ijrochiman, xolos. To‘g‘ri, Nurafshonda katta ishlar bo‘layotgani rost. Lekin, ularni mening nomim bilan bog‘lashlariga mutlaqo qarshiman. Men bu lavozimda amaldagi qonunlarimiz, davlat rahbari bergan topshiriq va vazifalar ijrosi bilan shug‘ullanaman. Afsuski, kimlardir mening tug‘ilgan kunimga sovg‘a tayyorlayman deb, o‘zini ham, meni ham jamoatchilik oldida noqulay ahvolga solib qo‘ydi.
Ijtimoiy tarmoqlarda bildirilayotgan fikrlarni o‘qish nihoyatda yoqimsiz bo‘lyapti. Zarracha shu ishga aloqam bo‘lganda ham bunchalik kuyinmas edim. Meni eng hayron qoldirayotgani — tanimagan, umrida bir marta ham ko‘rmagan odamlar tomonidan bildirilayotgan fikrlar. Shunday odamlarga aytamanki, o‘zingiz istagan paytda Nurafshonga keling, hamisha siz bilan suhbatlashishga tayyorman. Bu lavha orqali mening shaxsiyatim, ish uslubim haqida xulosa qilmang, iltimos.
Qahramon Hakimov, Nurafshon shahri hokimi
Izoh (0)