Ижтимоий тармоқларда Тошкент вилояти маркази бўлган Нурафшон шаҳри ҳокими Қаҳрамон Ҳакимовнинг туғилган кунига атаб тайёрлангани айтилган, бир гуруҳ йигитлар томонидан куйланган қўшиқ тарқалгани ҳақида хабар берилганди. Бу қўшиқ ижтимоий тармоқларда муҳокамаларга сабаб бўлди. Тошкент вилояти ҳокимлиги ахборот хизмати ва Нурафшон шаҳри ҳокимининг ўзи мазкур ҳолатга изоҳ берди.
Вилоят ҳокимлигининг маълум қилишича, қўшиқ шаҳар ҳокимлиги ахборот хизмати ва маданият бўлими ҳамкорлигида ҳудудда амалга оширилаётган ишларга оид видеолавҳаларни қўшиб тайёрланган. Ролик шаклидаги қўшиқ клипи Нурафшон шаҳри ҳокимлигининг Telegram’даги расмий каналида эълон қилинган.
Таъкидланишича, ҳеч ким билан маслаҳатлашмай, раҳбарга хуш ёқиш истагида тайёрланган, шахсга сиғиниш аломатлари яққол сезилиб турган бундай қўшиқни ижро этган, ролик тайёрлаган ва эълон қилган «ижодий жамоа» тегишли тартибда огоҳлантирилди. «Вазият кенг миқёсда муҳокама қилина бошлагач, давлат хизматчиси шаънига, нуфузига тўғри келмайдиган иш қилганини англаган шаҳар маданият бўлими, ахборот хизмати раҳбари ишдан бўшаш ҳақида ариза ёзди», — дейилади вилоят ҳокимлигининг баёнотида.
Маълум қилинишича, айни пайтда меҳнат қонунчилигида белгиланган тартибда, карантин даври учун Республика комиссияси эълон қилган меъёрлардан келиб чиқиб, бу ходимлар билан меҳнат шартномасини бекор қилиш ёки бошқа интизомий жазо белгилаш бўйича якуний қарорга келинмоқда.
Вилоят ҳокимлиги томонидан таъкидланишича, Нурафшон шаҳри ҳокими Қаҳрамон Ҳакимовнинг бундай ижодкорона «туҳфа» тайёрланаётганидан хабари бўлмаган. Роликни тайёрлаган жамоа уни ҳокимга унинг туғилган кунида кўрсатган. «Қаҳрамон Ҳакимов уларга эътибор учун миннатдорлик билдириб, бундай ишлар билан шуғулланмасликни, материални бирон жойда эълон қилмасликни сўраган», — дейилади баёнотда.
Ҳокимликнинг қайд этишича, шаҳар ҳокимини қўшиқ ва клип билан табриклаш фикри дастлаб шаҳар маданият бўлими раҳбари Бобур Абдуқодиров томонидан билдирилган, шоир Маъмуржон Бозоралиев сўз ёзиб берган, ахборот хизмати раҳбари Равшан Мирзақулов турли даврларда олинган архив кадрларни қўшиб клип тайёрлаган. «Бир гуруҳ фаоллар яхши ниятда, бажараётган ишлари санъат нуқтаи назаридан, шунингдек, ахборот сиёсати, этикага кўра, мутлақо нотўғри эканини чуқур англамасдан шу ишга қўл урган», — дейилади ҳокимлик изоҳида.
Шунингдек, Нурафшон шаҳри ҳокими Қаҳрамон Ҳакимов ҳам мазкур вазиятга изоҳ берган.
Кеча ва бугун интернетда бундай қўштирноқ ичидаги «қаҳрамон»га айланиб қолганимдан халқимиз, журналистларимиз ва раҳбарият олдида ниҳоятда хижолатдаман. Шундай лавҳа тайёрлаб, менга кўрсатишганда, эътибор учун уларга миннатдорлик билдириб, лавҳани тарқатмасликни, бошқа бунақа ишлар билан шуғулланмасликни қатъий тайинлаган эдим. Афсуски, лавҳа тарқалиб кетибди.Дангалини айтганда, менга шу керак эдими? Мутлақо йўқ. Мен бир ижрочиман, холос. Тўғри, Нурафшонда катта ишлар бўлаётгани рост. Лекин, уларни менинг номим билан боғлашларига мутлақо қаршиман. Мен бу лавозимда амалдаги қонунларимиз, давлат раҳбари берган топшириқ ва вазифалар ижроси билан шуғулланаман. Афсуски, кимлардир менинг туғилган кунимга совға тайёрлайман деб, ўзини ҳам, мени ҳам жамоатчилик олдида ноқулай аҳволга солиб қўйди.
Ижтимоий тармоқларда билдирилаётган фикрларни ўқиш ниҳоятда ёқимсиз бўляпти. Заррача шу ишга алоқам бўлганда ҳам бунчалик куйинмас эдим. Мени энг ҳайрон қолдираётгани — танимаган, умрида бир марта ҳам кўрмаган одамлар томонидан билдирилаётган фикрлар. Шундай одамларга айтаманки, ўзингиз истаган пайтда Нурафшонга келинг, ҳамиша сиз билан суҳбатлашишга тайёрман. Бу лавҳа орқали менинг шахсиятим, иш услубим ҳақида хулоса қилманг, илтимос.
Қаҳрамон Ҳакимов, Нурафшон шаҳри ҳокими
Изоҳ (0)