Наманган вилоятининг Тўрақўрғон туманида 70 ёшни қоралаган отахон маҳалла идораси учун шахсий мулки бўлган бинонинг 5 та хонасини хатлаб берди. Бу ҳақда «Дарё» мухбири Азизбек Абдувалиев хабар бермоқда.
Муслимхўжа Қосимов ўзи 13 йил давомида «Соҳилобод» маҳалласини бошқарган. Асли дурадгор уста бўлган отахон ҳозирда кексалик гаштини сурмоқда.
— Бу жой собиқ «Соҳибкор» жамоа хўжалигининг биноси бўлган. Сув хўжалиги ташкилоти балансига ўтказиб берилган бино 2018 йилда ташкилотнинг қарзи туфайли сотувга қўйилганди. Уни тадбиркорлик билан шуғулланиш мақсадида 54 миллион сўмга сотиб олгандим. Маҳаллага нафим тегсин деб, қолаверса, ўзим ишлаган даргоҳ бўлгани учун 5 та хонани МФЙ учун ўтказиб бердим. Қолган 4 хонада мебель цехи очишни режалаб турибман, — дейди Муслимхўжа Қосимов.
«Соҳилобод»нинг ҳозирги раиси Назокат Баратованинг айтишича, 2,5 мингга яқин аҳоли истиқомат қиладиган ва асосан узум етиштириш билан шуғулланадиган маҳалла учун бу ташаббус айни муддао бўлади. Ҳозирда маҳалла аҳли бирлашиб, идора томини янгилаш ишлари билан банд. Бунинг учун фуқаролар саъй-ҳаракати билан 15 миллион сўмга яқин маблағ йиғилди.
— Маҳалламиз биносини замонавий қиёфага келтириш учун ҳар бир соҳилободлик ҳисса қўшяпти десам муболаға эмас. Ҳозирги қийин шароитига қараб ўтирмасдан ҳашар ва эҳсонлар уюштириляпти. Кимдир пул берган, яна кимдир қурилиш ашёлари олиб келган, усталардан хабар олиб туришибди. «Бир хайрли иш бошқаларини етаклайди» деганлари бежиз эмас, — дейди Назокат Баратова.
Изоҳ (0)