O‘zbekistonda bir kechada 32 kishida koronavirus aniqlandi. Jami kasallanish holatlari soni 4900 dan oshdi

O‘zbekistonda 13-iyun soat 10:00 holatiga ko‘ra, koronavirus infeksiyasiga chalinganlar yana 32 nafarga ko‘paydi va kasallanganlarning umumiy soni 4901 nafarga yetdi. Bu haqda Sog‘liqni saqlash vazirligi xabar berdi.

Yangi kasallanish holatlarining barchasi karantin markazidagi fuqarolar orasida aniqlangan. Shundan 22 nafari koronavirusga chalinganlar bilan muloqotda bo‘lgan, 10 nafari esa xorijdan chegara post orqali O‘zbekistonga kirib kelgan.

Hozirda 1124 nafar bemorga shifokorlar tomonidan belgilangan standartlar bo‘yicha davo choralari ko‘rilmoqda. Ulardan 14 nafari og‘ir, 2 nafari esa o‘ta og‘ir ahvolda.

Ma’lumot uchun, O‘zbekistonda hozirgacha 3758 nafar fuqaro sog‘aygan, 19 nafar bemor esa kasallik asoratlari oqibatida vafot etgan.