Qashqadaryo viloyati hokimi Zoir Mirzayev viloyatdagi paxtachilikka ixtisoslashgan Indorama Agro xorijiy korxona rahbarlari bilan suhbatlashdi. Bu haqda viloyat hokimligi xabar berdi.
Ma’lum qilinishicha, Indorama Agro xorijiy korxonasi tomonidan Kasbi va Nishon tumanlarida paxtani qayta ishlab, ip kalava ishlab chiqarish yo‘lga qo‘yilgan.
Suhbat davomida viloyat rahbari hozirgi g‘alla o‘rimi mavsumining mas’uliyati yuzasidan o‘z fikrlarini aytib o‘tdi.
“Tunlari shamol bo‘lsa, uyqum qochadi. Hozir o‘rimning ayni pallasi. Hosilni nest-nobud qilmasdan yig‘ib olish uchun katta kuch safarbar etganmiz”, — dedi viloyat hokimi.
Viloyat hokimligining qayd etishicha, respublikada g‘alla o‘rimining borishi bo‘yicha Surxondaryo, Sirdaryo, Buxoro va Qashqadaryo viloyatlari ilg‘orlar safida turibdi.
Eslatib o’tamiz, Qashqadaryo viloyati Qarshi tumanida mahalliy hokimlik va paxta klasteri o‘rtasida yuzaga kelgan kelishmovchilik yuzasidan bo‘lib o‘tgan sud jarayonida tuman hokimligi klasterga yutqazdi. Sud tuman hokimiga klaster ishiga aralashishni taqiqladi.
Izoh (0)