Швейцариядаги иш берувчиларга масофадан ишлаётган ходимларнинг ижара ҳақини тўлаш мажбурияти юклатилди

Швейцариядаги иш берувчи корхоналарга масофадан туриб ишлаётган ходимларининг турар жойи ижара ҳақининг бир қисмини қоплаш мажбурияти юклатилди, деб ёзмоқда Swissinfo.ch.

Лозаннадаги федераль суд агар ходим уйдан ишлаш режимига ўтказилган бўлса, иш берувчилар ходимнинг турар жойи ижара ҳақининг бир қисмини қоплаб бериши шартлиги тўғрисида қарор чиқарди. Бундай қарорга биринчилардан бўлиб Tages-Anzeiger ва Sonntagszeitung газеталари эътибор қаратган.

Маълум бўлишича, иш берувчининг қарори билан масофадан ишлашга ўтказилган бухгалтерия компаниясининг ходимларидан бири ўзининг икки хонали квартираси ошхонасини иш кабинетига айлантиришга мажбур бўлган. У судга даъво аризаси билан мурожаат қилган. Суд унинг даъвосини қаноатлантирган.

Иш берувчи судда уларнинг ходим билан келишувига кўра ҳеч қандай моддий компенсация назарда тутилмаганини таъкидлаган. Бироқ суд иш берувчининг эътирозини рад этиб, ходим компенсацияни ўтган сана билан расмийлаштириши мумкинлигини таъкидлаган. Бунда у ўз ошхонасида ишлаганми ёки иш жойини ташкил қилиш учун қўшимча жойни ижарага олишга мажбур бўлганми, муҳим эмас.

Суд ҳар ойлик компенсация миқдорини 150 Швейцария франки (154 АҚШ доллари)га тенг деб топишни адолатли деб баҳолаган.

Санкт-Галлен университетининг Меҳнат ҳуқуқи кафедраси профессори Томас Гайзернинг таъкидлашича, суд қарори ажабланарли эмас, чунки қонунчиликда иш берувчиларга ходимлар ўз иш вазифаларини бажариши учун лозим бўлган барча харажатларни қоплаш мажбурияти кўзда тутилган. Шунингдек, унинг таъкидлашича, бундай қарор фақат иш берувчининг буйруғи билан уйда ишлаётган ходимларга нисбатан татбиқ этилади. Ўз хоҳиши билан уйдан ишлашга ўтган ходимлар бундай компенсацияга даъвогарлик қила олмайди.

Лозанна федераль судининг қарори коронавирус пандемияси туфайли уйдан ишлаш ҳолатлари сонининг кескин ошиши шароитида қабул қилинган.

Швейцария касаба уюшмалари конфедерацияси бош котиби Лука Чирильянонинг айтишича, компаниялар кўпинча иш жойлари ижараси учун маблағни тежаш учун иш жойларини қисқартириш сиёсатидан фойдаланади ва бу билан барча харажатларни ходимнинг зиммасига юклайди, бу эса адолатдан эмас.