Karantin paytida Samarqand shahrida elektr energiyasidan qarzdorligi mavjud aholi xonadonlari tarmoqdan uzib qo‘yilayotganligi sababli shahar elektr tarmoqlari korxonasi binosida yuzlab odamlar to‘planib, karantin talablari buzilmoqda.
“Daryo” muxbiri bilan suhbatlashgan fuqarolarning ma’lum qilishicha, karantinda elektr energiyasi uzib qo‘yilmasligi, qolaversa, pandemiya davrida uydan chiqmaslik talab etilgani bois ular to‘lovlarni o‘z vaqtida amalga oshirolmagan.
Samarqand viloyat hududiy elektr tarmoqlari korxonasi axborot xizmati rahbari Gulzuhra Saydullayevaning ma’lum qilishicha, “Elektr energiyasi va tabiiy gaz yetkazib berish hamda iste’mol qilish sohasida to‘lov intizomini yanada mustahkamlash, shuningdek, ijro ishi yuritish tizimini tubdan takomillashtirish chora-tadbirlari to‘g‘risida”gi Prezident farmoni, “Koronavirus pandemiyasi davrida O‘zbekiston Respublikasi davlat budjeti barqarorligini ta’minlash va birinchi navbatdagi tadbirlarni o‘z vaqtida moliyalashtirish” chora-tadbirlari to‘g‘risidagi Prezident qarorida davlat budjeti barqarorligini ta’minlashning ustuvor yo‘nalishlaridan biri sifatida fuqarolik-shartnomaviy kelishuvlar asosida ko‘rsatilgan xizmatlar uchun to‘lovlarni amalga oshirish belgilangan. Qarzdor fuqarolar xonadoni MIB Samarqand shahar bo‘limi tomonidan tarmoqdan uzib qo‘yilmoqda.
“Qarzdor fuqarolarni tarmoqdan uzib qo‘yish bizning vakolatimizga kirmaydi, bu ishni faqat MIB amalga oshiradi. O‘rganish davomida, Samarqand shahri va tumanlardagi ayrim fuqarolarning elektr energiyadan vujudga kelgan qarzdorligi oshib ketayotganligi aniqlanib, ular tarmoqdan uzilgan, — deydi Gulzuhra Saydullayeva. — Fuqarolarga byuroning davlat inspektorlari tomonida sanitariya va gigiyena talablariga rioya qilingan holda qarzdorlikni o‘z sharoitidan kelib chiqib, imkoniyati darajasida bartaraf qilishi mumkinligi tushuntirilib borilgan. Biroq fuqarolar buni to‘g‘ri tushunmagan holda ijtimoiy tarmoqlarga murojaat qilgan.
Gulzuhra Saydullayevaning aytishicha, ijtimoiy tarmoqlarda Samarqand shahar elektr ta’minoti korxonasida elektr energiyasi to‘lovi bo‘yicha turnaqator navbatlar kelib chiqqani yozilganidan so‘ng bu holat bartaraf etilgan. Hozirda iste’molchilar o‘rtasida ikki metrdan kam bo‘lmagan masofada binoga to‘rt kishidan kirilib, elektr energiyasi uchun to‘lovlar amalga oshirilmoqda.
“Majburiy ijro byurosi xodimlari to‘lov madaniyati va ijro intizomiga rioya etuvchi va asosiysi qarzdor bo‘lmagan fuqarolarni bezovta qilmaydi. Qolaversa, aholining asosiy qismi bu paytda o‘z uylarida bo‘lishi sababli energiya resurslariga bo‘lgan ehtiyoj yanada ortib, to‘lovlarning o‘z vaqtida amalga oshirilmasligi qarzdorliklarning ko‘payishiga sabab bo‘ladi”, — deydi Samarqand viloyat hududiy elektr tarmoqlari korxonasi axborot xizmati rahbari.
Murojaatchilarning aytishicha, fuqarolarni nafaqat elektr energiyasining uzilishi, balki to‘lov amalga oshirilgandan so‘ng uni ulashdagi muammolar ham qiynamoqda. Qarzdorlik sabab o‘chirilgan tarmoqlar bloklanib qolgan. Uni ochish uchun esa soha mutaxassislari bo‘lishi kerak. Ammo karantinda xodimlarga javob berib yuborilganligi sababli ular bilan ham bog‘lanish qiyinchilik tug‘dirmoqda. Natijada pul to‘lovini amalga oshirgan fuqarolarning tarmoqqa o‘z vaqtida ulanishi ham kechikmoqda.
MIB Samarqand viloyat boshqarmasi axborot xizmati karantin davrida fuqarolar uyidan chiqmasdan to‘lovlarni amalga oshirishi uchun barcha qulayliklar yaratilganligini, buning uchun ijtimoiy tarmoqlardagi maxsus kanallar orqali e’lon berilganini ma’lum qildi.
Ta’kidlash lozimki, “Hududiy elektr tarmoqlari” AJ mamlakatda koronavirus tarqalishining oldini olish hamda uni yuqtirib oluvchilar sonining ko‘payib ketmasligi uchun aholining sanitariya-epidemiologik osoyishtaligini ta’minlash maqsadida qarzdorligi mavjud jismoniy shaxslarning elektr energiyasi vaqtincha uzilmasligini ma’lum qilgandi.
Izoh (0)