Карантин пайтида Самарқанд шаҳрида электр энергиясидан қарздорлиги мавжуд аҳоли хонадонлари тармоқдан узиб қўйилаётганлиги сабабли шаҳар электр тармоқлари корхонаси биносида юзлаб одамлар тўпланиб, карантин талаблари бузилмоқда.
«Дарё» мухбири билан суҳбатлашган фуқароларнинг маълум қилишича, карантинда электр энергияси узиб қўйилмаслиги, қолаверса, пандемия даврида уйдан чиқмаслик талаб этилгани боис улар тўловларни ўз вақтида амалга оширолмаган.
Самарқанд вилоят ҳудудий электр тармоқлари корхонаси ахборот хизмати раҳбари Гулзуҳра Сайдуллаеванинг маълум қилишича, «Электр энергияси ва табиий газ етказиб бериш ҳамда истеъмол қилиш соҳасида тўлов интизомини янада мустаҳкамлаш, шунингдек, ижро иши юритиш тизимини тубдан такомиллаштириш чора-тадбирлари тўғрисида»ги Президент фармони, «Коронавирус пандемияси даврида Ўзбекистон Республикаси давлат бюджети барқарорлигини таъминлаш ва биринчи навбатдаги тадбирларни ўз вақтида молиялаштириш» чора-тадбирлари тўғрисидаги Президент қарорида давлат бюджети барқарорлигини таъминлашнинг устувор йўналишларидан бири сифатида фуқаролик-шартномавий келишувлар асосида кўрсатилган хизматлар учун тўловларни амалга ошириш белгиланган. Қарздор фуқаролар хонадони МИБ Самарқанд шаҳар бўлими томонидан тармоқдан узиб қўйилмоқда.
«Қарздор фуқароларни тармоқдан узиб қўйиш бизнинг ваколатимизга кирмайди, бу ишни фақат МИБ амалга оширади. Ўрганиш давомида, Самарқанд шаҳри ва туманлардаги айрим фуқароларнинг электр энергиядан вужудга келган қарздорлиги ошиб кетаётганлиги аниқланиб, улар тармоқдан узилган, — дейди Гулзуҳра Сайдуллаева. — Фуқароларга бюронинг давлат инспекторлари томонида санитария ва гигиена талабларига риоя қилинган ҳолда қарздорликни ўз шароитидан келиб чиқиб, имконияти даражасида бартараф қилиши мумкинлиги тушунтирилиб борилган. Бироқ фуқаролар буни тўғри тушунмаган ҳолда ижтимоий тармоқларга мурожаат қилган.
Гулзуҳра Сайдуллаеванинг айтишича, ижтимоий тармоқларда Самарқанд шаҳар электр таъминоти корхонасида электр энергияси тўлови бўйича турнақатор навбатлар келиб чиққани ёзилганидан сўнг бу ҳолат бартараф этилган. Ҳозирда истеъмолчилар ўртасида икки метрдан кам бўлмаган масофада бинога тўрт кишидан кирилиб, электр энергияси учун тўловлар амалга оширилмоқда.
«Мажбурий ижро бюроси ходимлари тўлов маданияти ва ижро интизомига риоя этувчи ва асосийси қарздор бўлмаган фуқароларни безовта қилмайди. Қолаверса, аҳолининг асосий қисми бу пайтда ўз уйларида бўлиши сабабли энергия ресурсларига бўлган эҳтиёж янада ортиб, тўловларнинг ўз вақтида амалга оширилмаслиги қарздорликларнинг кўпайишига сабаб бўлади», — дейди Самарқанд вилоят ҳудудий электр тармоқлари корхонаси ахборот хизмати раҳбари.
Мурожаатчиларнинг айтишича, фуқароларни нафақат электр энергиясининг узилиши, балки тўлов амалга оширилгандан сўнг уни улашдаги муаммолар ҳам қийнамоқда. Қарздорлик сабаб ўчирилган тармоқлар блокланиб қолган. Уни очиш учун эса соҳа мутахассислари бўлиши керак. Аммо карантинда ходимларга жавоб бериб юборилганлиги сабабли улар билан ҳам боғланиш қийинчилик туғдирмоқда. Натижада пул тўловини амалга оширган фуқароларнинг тармоққа ўз вақтида уланиши ҳам кечикмоқда.
МИБ Самарқанд вилоят бошқармаси ахборот хизмати карантин даврида фуқаролар уйидан чиқмасдан тўловларни амалга ошириши учун барча қулайликлар яратилганлигини, бунинг учун ижтимоий тармоқлардаги махсус каналлар орқали эълон берилганини маълум қилди.
Таъкидлаш лозимки, «Ҳудудий электр тармоқлари» АЖ мамлакатда коронавирус тарқалишининг олдини олиш ҳамда уни юқтириб олувчилар сонининг кўпайиб кетмаслиги учун аҳолининг санитария-эпидемиологик осойишталигини таъминлаш мақсадида қарздорлиги мавжуд жисмоний шахсларнинг электр энергияси вақтинча узилмаслигини маълум қилганди.
Изоҳ (0)