Toshkentda joylashgan Alisher Navoiy nomidagi O‘zbekiston Milliy bog‘ida Adiblar xiyobonini barpo etish uchun 175,6 milliard so‘m ajratilgani ma’lum bo‘ldi. Bu haqda Davlat xaridlari portaliga tayanib, “Anhor.uz” xabar berdi.
Ta’kidlanishicha, pudratchi — Prezident apparati Ishlar boshqarmasining Qurilish birlashmasi.
Eslatib o‘tamiz, Adiblar xiyoboni 20-may kuni ochilgan edi. Bu boradagi reja O‘zbekiston Prezidentining 2017-yil 3-fevral kuni mazkur bog‘ga tashrif chog‘ida begilangan. O‘sha yili 18-aprelda davlat rahbarining tegishli qarori qabul qilinib, xiyobonning me’moriy-g‘oyaviy loyihasi ishlab chiqilgan.
Ma’lumotlarga ko‘ra, o‘tgan vaqt mobaynida qurilish va obodonlashtirish ishlari amalga oshirilib, 8 gektardan ziyod maydonda Adiblar xiyobonining yaxlit me’moriy ansambli yaratilgan.
Adiblar xiyobonini g‘oyaviy-badiiy jihatdan yanada boyitish maqsadida Bobur, Ogahiy, Berdaq, Muqimiy, Furqat, Behbudiy, Avloniy, Cho‘lpon, Qodiriy, To‘lepbergen Qayipbergenov, Ibrohim Yusupov, Aleksandr Faynberg singari atoqli namoyandalar xotirasiga bag‘ishlangan yangi yodgorlik majmualari o‘rnatilgan. Shuningdek, xiyobon ichidan Toshkent shahri muzeyi o‘rin olgan.
Izoh (0)