“O‘zbekneftgaz” kompaniyasi benzin importiga aksiz solig‘ini 5 foizdan 20 foizga oshirishni taklif qildi. Ijtimoiy tarmoqlarda tarqalgan hujjatning haqiqiy ekanligini “O‘zbekneftgaz” va Energetika vazirligi tasdiqlagan, deb xabar beradi “Gazeta.uz”.
“Olib kirilayotgan tovarlarga solinadigan aksiz soliqlarini nol qiymatda belgilanishi munosabati bilan import qilinadigan xomashyoga xarajatlarni qisqartirish yo‘li bilan respublika iste’molchilarini arzon neft mahsulotlari bilan ta’minlash maqsadida Investitsiyalar va tashqi savdo vazirligi tomonidan ichki bozorni himoya qilish bo‘yicha taklif qilinayotgan choralarni dolzarb deb hisoblaymiz”, — deyiladi hujjatda.
Shu bilan birga, neftni qayta ishlash zavodlarining ishlab chiqarish quvvatini ta’minlash maqsadida “O‘zbekneftgaz” ayrim tayyor neft mahsulotlarining importiga solinadigan aksiz solig‘i stavkalarini qayta ko‘rib chiqishni so‘ramoqda.
Taklif etilgan stavkalarga ko‘ra, bitumdan olinadigan neft va neft mahsulotlariga aktsiz solig‘ini 5 foizdan 0 foizgacha kamaytirish rejalashtirilgan. Biroq AI-80, AI-91, AI-92 benzinlariga aksiz solig‘ini 5 foizdan 20 foizgacha ko‘tarish taklif etilmoqda. Shuningdek, Jet A-1 markali gaz trubina dvigatellari va “TS-1” reaktiv dvigatellari uchun aviayoqilg‘i stavkalari ham oshishi mumkin.
Eslatib o‘tamiz, “O‘zbekneftgaz” joriy yil 29-apreldan boshlab AI-92 markadagi benzin narxini 500 so‘mga arzonlatib, 5500 so‘m qilib belgilanishini xabar qildi. 3-maydan boshlab esa AI-80 benzini ham 500 so‘mga pasayib, 4000 so‘mdan sotish yo‘lga qo‘yildi.
Izoh (0)