Shotlandiyadagi fermada ho‘kiz elektr simyog‘ochga ishqalanib, qashinishga qaror qildi, biroq kuchini inobatga olmadi va 800 ta uyni chiroqsiz qoldirdi, deb yozadi “Korrespondent.net”.
Janubiy Lanarkshirdagi ferma egasi Heyzel Loton sigirlarga yem berishga kelganida ferma yaqinidagi simyog‘och transformatordan uzilib ketganini payqagan.
“Biz har tomonlama o‘ylab ko‘rib, ho‘kiz simyog‘ochga qashinganida undagi qutini tushirib yuborgan, degan xulosaga keldik”, — deydi Heyzel.
Heyzel eri bilan “jinoyat joyi”ni ko‘zdan kechirayotganida ho‘kiz ham ularga ergashgan.
Hodisa joyiga elektr tarmoqlari korxonasi muhandislari kelganida, ho‘kiz ushbu qilmishi bilan 3 ta qishloqdagi 800 ta xonadonni elektrsiz qoldirgani ma’lum bo‘lgan.
Mutaxassislarning fikricha, sigir va ho‘kizlar simyog‘ochga tez-tez teginib turadi, biroq bunday holat birinchi marta kuzatilmoqda.
Muhandislar elektr ta’minotini qayta tiklash uchun olti soat vaqt sarflagan.
Izoh (0)