O‘zbekiston Senatining 11-may kuni videokonferensaloqa shaklida bo‘lib o‘tgan to‘rtinchi yalpi majlisida Oliy Majlisning Inson huquqlari bo‘yicha vakili — Ombudsmanning 2019-yildagi faoliyati to‘g‘risida hisoboti tinglandi. Ombudsman Ulug‘bek Muhammadiyev mazkur hisobotni taqdim etdi.
Senat raisi Tanzila Norboyeva Ombudsmanning faoliyatiga munosabat bildirdi hamda uni xalq bilmasligi va tanimasligini aytdi.
OAVda Ombudsman roli mutlaqo sezilmaydi. 2019-yilda OAVda atigi 74 ta chiqish qilingan, xolos. Xalq sizlarni bilmaydi, tanimaydi.“O‘tgan yilda Ombudsmanga 12 800 dan ziyod murojaat kelib tushgan. Lekin ularning qanchasi yoki necha foizi ijobiy hal qilingan degan savolga aniq javob topa olmadim. Bor-yo‘g‘i 20 foiz murojaat nazoratga olingan, xolos”, — deya ta’kidladi Tanzila Narboyeva.OAV va ijtimoiy tarmoqlarda ko‘plab muammolar muhokama qilinmoqda. Lekin Ombudsman birorta ham masalaga munosabat bildirmaydi. Shu bois, OAV bilan hamkorlikni tubdan o‘zgartirish kerak.
Bizning qo‘mitalar, senatorlar ham chetda kuzatuvchi bo‘lib turmasdan, Ombudsman faoliyatini kuchaytirishga ko‘maklashishi zarur.
Zero, Ombudsman Parlamentning inson huquqlari bo‘yicha vakili hisoblanadi.
Tanzila Norboyeva, Senat raisi
Senat raisi bu juda ham past ko‘rsatkich ekanligini qayd etdi hamda murojaatlarning aksariyatini nazoratga olish lozimligini, aynan murojaatlarda odamlarni qiynayotgan muammolar o‘z ifodasini topishini aytib o‘tdi. Shuningdek, Tanzila Norboyeva Ombudsmanning murojaatlar bilan ishlash tizimini tubdan qayta ko‘rib chiqishi lozimligini ta’kidladi.
“Senat qo‘mitalarining Ombudsman bilan hamkorligi sezilmayapti. Nima uchun Ombudsman va qo‘mitalar birgalikda odamlarni qiynayotgan masalalarni o‘rganib, muammolarni aniqlab, Senatga takliflar kiritmaydi? Ushbu muammolar va ularning ko‘rib chiqilishi natijasida respublikadagi tizimli muammolarni aniqlash mumkin va buning natijasida qonunchilikka ham o‘zgartirishlar kiritish mumkin bo‘ladi”, — dedi Tanzila Norboyeva,
Uning qayd etishicha, Odam savdosi va majburiy mehnatga qarshi kurashish bo‘yicha hamda Korrupsiyaga qarshi kurashish bo‘yicha komissiyalar bilan Ombudsman faol hamkorlik qilishi kerak. Biroq Ombudsman hozir faqatgina komissiyalar tadbirlarida ishtirok etish bilangina cheklanib qolmoqda.
Ta’kidlanishicha, bu borada aholi duch kelayotgan muammolar bo‘yicha komissiyalarga taklif kiritish kerak. Ichki ishlar vazirligi yoki Bosh prokuraturaga so‘rov yuborib kutib o‘tirish emas, balki komissiyalarga ko‘rib chiqish uchun masala kiritish kerak.
Eslatib o‘tamiz, mazkur yig‘ilishda senatorlar O‘zbekistonning Yevrosiyo iqtisodiy ittifoqiga (YeOII) kuzatuvchi davlat sifatida qo‘shilishi to‘g‘risidagi taklifni ma’qulladi.
Izoh (0)