Ўзбекистон Сенатининг 11 май куни видеоконференцалоқа шаклида бўлиб ўтган тўртинчи ялпи мажлисида Олий Мажлиснинг Инсон ҳуқуқлари бўйича вакили — Омбудсманнинг 2019 йилдаги фаолияти тўғрисида ҳисоботи тингланди. Омбудсман Улуғбек Муҳаммадиев мазкур ҳисоботни тақдим этди.
Сенат раиси Танзила Норбоева Омбудсманнинг фаолиятига муносабат билдирди ҳамда уни халқ билмаслиги ва танимаслигини айтди.
ОАВда Омбудсман роли мутлақо сезилмайди. 2019 йилда ОАВда атиги 74 та чиқиш қилинган, холос. Халқ сизларни билмайди, танимайди.«Ўтган йилда Омбудсманга 12 800 дан зиёд мурожаат келиб тушган. Лекин уларнинг қанчаси ёки неча фоизи ижобий ҳал қилинган деган саволга аниқ жавоб топа олмадим. Бор-йўғи 20 фоиз мурожаат назоратга олинган, холос», — дея таъкидлади Танзила Нарбоева.ОАВ ва ижтимоий тармоқларда кўплаб муаммолар муҳокама қилинмоқда. Лекин Омбудсман бирорта ҳам масалага муносабат билдирмайди. Шу боис, ОАВ билан ҳамкорликни тубдан ўзгартириш керак.
Бизнинг қўмиталар, сенаторлар ҳам четда кузатувчи бўлиб турмасдан, Омбудсман фаолиятини кучайтиришга кўмаклашиши зарур.
Зеро, Омбудсман Парламентнинг инсон ҳуқуқлари бўйича вакили ҳисобланади.
Танзила Норбоева, Сенат раиси
Сенат раиси бу жуда ҳам паст кўрсаткич эканлигини қайд этди ҳамда мурожаатларнинг аксариятини назоратга олиш лозимлигини, айнан мурожаатларда одамларни қийнаётган муаммолар ўз ифодасини топишини айтиб ўтди. Шунингдек, Танзила Норбоева Омбудсманнинг мурожаатлар билан ишлаш тизимини тубдан қайта кўриб чиқиши лозимлигини таъкидлади.
«Сенат қўмиталарининг Омбудсман билан ҳамкорлиги сезилмаяпти. Нима учун Омбудсман ва қўмиталар биргаликда одамларни қийнаётган масалаларни ўрганиб, муаммоларни аниқлаб, Сенатга таклифлар киритмайди? Ушбу муаммолар ва уларнинг кўриб чиқилиши натижасида республикадаги тизимли муаммоларни аниқлаш мумкин ва бунинг натижасида қонунчиликка ҳам ўзгартиришлар киритиш мумкин бўлади», — деди Танзила Норбоева,
Унинг қайд этишича, Одам савдоси ва мажбурий меҳнатга қарши курашиш бўйича ҳамда Коррупцияга қарши курашиш бўйича комиссиялар билан Омбудсман фаол ҳамкорлик қилиши керак. Бироқ Омбудсман ҳозир фақатгина комиссиялар тадбирларида иштирок этиш билангина чекланиб қолмоқда.
Таъкидланишича, бу борада аҳоли дуч келаётган муаммолар бўйича комиссияларга таклиф киритиш керак. Ички ишлар вазирлиги ёки Бош прокуратурага сўров юбориб кутиб ўтириш эмас, балки комиссияларга кўриб чиқиш учун масала киритиш керак.
Эслатиб ўтамиз, мазкур йиғилишда сенаторлар Ўзбекистоннинг Евросиё иқтисодий иттифоқига (ЕОИИ) кузатувчи давлат сифатида қўшилиши тўғрисидаги таклифни маъқуллади.
Изоҳ (0)