Koronavirus infeksiyasi va antitanalarga o‘tkazilgan testlar kasallikning har qanday bosqichida xato natijalarni ko‘rsatishi mumkin. Bu haqda biologiya fanlari doktori, AQShdagi GMU tizimli biologiya maktabi professori Ancha Baranova “RIA Novosti”ga ma’lum qilgan.
Olimning so‘zlariga ko‘ra, infeksiyani yuqtirib olgan odamda kasallikning dastlabki bosqichida COVID-19 belgilari kuzatilmasa, virus organizmda ko‘payishi va interferonlar hisobiga infeksiya bosim ostida qolishi mumkin. Bunda organizm tabiiy ravishda antitana shakllantirmasda virusga qarshi kurashadi, shu sababli antitana tahlili ham “manfiy” bo‘lishi mumkin.
Ikkinchi bosqichda isitma ko‘tarilib, yo‘tal va boshqa belgilar namoyon bo‘lgach organizmda qo‘shimcha himoya harakatlari amalga oshadi, bemor esa virusga qarshi turli preparatlar qabul qiladi. Eng yomon holatda kasallik yengib o‘tilmaydi, virus mahv etilsa ham pnevmoniya boshqa omillar hisobiga rivojlanishda davom etadi. Koronavirusga topshirilgan har bir test esa “manfiy” natija ko‘rsatadi, ammo hammasi ortda qolmaydi, uchinchi bosqich avvalgi ikkisidan ham og‘ir o‘tadi.
Baranova uchinchi bosqichda organizm to‘qimalarining nazorat qilib bo‘lmaydigan yallig‘lanishi boshlanishi mumkinligini ta’kidladi. Ushbu holatda bemor kasalxonaga yotqiziladi va sun’iy nafas oldirish apparatiga ulanadi.
“Kasallikdan tuzalishning asosiy omili — odam organizmining unga bardoshliligi”, — degan rossiyalik olim.
Avval “Rosptrebnadzor” Rossiyada 9-may holatiga ko‘ra, koronavirus infeksiyasini aniqlash maqsadida 5,2 million laborator tadqiqot o‘tkazilganini ma’lum qilgan.
Moskva vitse-meri Anastasiya Rakova poytaxtda koronavirus bilan kasallanganlarni aniqlaydigan yangi test metodidan foydalanilayotganini bildirgan. Tibbiyot xodimlari vena tomiridan olingan qonda immunoferment tahlilini o‘tkazadi.
Izoh (0)