Yangi Zelandiyadagi Jucy ijara kompaniyasining 97 ta avtomobili olib qochildi, biroq hech kim buni payqamagan — kompaniya xodimlari o‘z uylarida izolyatsiyada bo‘lgan. Yo‘qolgan mashinalarni aniqlashga kompaniyaga qarashli avtomobilni to‘satdan to‘xtatgan mahalliy politsiya yordam bergan, deb xabar qiladi Motor.
Ijaraga beriladigan avtomobillar kompaniya xodimlari koronavirus pandemiyasi sabab o‘z uylarida izolyatsiya bo‘lgan vaqtida avtoturargohdan o‘g‘irlab ketilgan. O‘g‘rilar nafaqat yengil avtomobillarni, balki kompaniya tomonidan mamlakat bo‘ylab sayohat uchun taqdim etiladigan avtouyni ham minib qochgan.
O‘g‘irlangan avtomobillarni aniqlashga ijara kompaniyasiga qarashli bir necha shubhali mashinalarni to‘xtatgan mahalliy politsiya yordam bergan. Ijaraga beriladigan avtomobillar maxsus avtoturargohda joylashtirilgandan keyingina Jucy xodimlari o‘g‘irlikdan xabar topgan.
Hozirga qadar politsiya avtomobillar o‘g‘irlash bilan shug‘ullanuvchi mahalliy jinoiy guruhlarga aloqador 29 kishini qo‘lga olishga muvaffaq bo‘lgan. Yo‘qolgan 97 mashinaning 85 tasi kompaniyaga qaytarilgan, qolgan 12 tasi hamon qidiruvda.
Ta’kidlash kerakki, koronavirus pandemiyasi sabab ijaraga avtomobil berish bilan shug‘ullanuvchi ko‘plab kompaniyalar yopilishga majbur bo‘lgan.
Izoh (0)