Prezident Shavkat Mirziyoyevning belgilab bergan vazifalar ijrosini so‘zsiz va samarali ta’minlash maqsadida Bosh prokuraturada maxsus shtab, favqulodda hodisa oqibatlarini bartaraf etishga ko‘maklashish bo‘yicha ishchi guruhlar ish boshladi.
Bosh prorokuratura matbuot xizmatining “Daryo”ga ma’lum qilishicha, shtabning asosiy vazifalari etib quyidagilar belgilandi:
- Sardoba, Oqoltin va Mirzaobod tumanlarida favqulodda hodisa oqibatlarini bartaraf etish bo‘yicha chora-tadbirlarni amalga oshirishda ko‘maklashish;
- evakuatsiya qilingan aholini zarur oziq-ovqat mahsulotlari, shaxsiy himoya va gigiyena vositalari, yotoq anjomlari, shuningdek, kuniga uch mahal issiq ovqat bilan uzluksiz ta’minlashni tashkil etish;
- favqulodda hodisa ro‘y bergan hududlarda huquqbuzarlik va jinoyatlarning oldini olish, jamoat tartibini saqlash, fuqarolar xavfsizligi hamda tegishli mol-mulklar muhofaza qilinishini nazoratga olish;
- jabrlangan fuqarolarning murojaatlari tezkorlik bilan ko‘rib chiqilishi hamda ularda ko‘tarilgan masalalarning hal etilishini ta’minlash;
- aholi orasida yolg‘on, noto‘g‘ri ma’lumot va xabarlar hamda sarosima tarqalishining oldini olish.
Mavzuga doir: Qulagan temir ustunlar, ag‘darilgan kombayn — Sardoba suv ombori atrofida talafot yetgan yerlardan fotoreportaj
Bosh prokuratura matbuot xizmatining bildirishicha, xayriya sifatida jo‘natilayotgan oziq-ovqat va boshqa zaruriy mahsulotlar o‘z vaqtida, qat’iy nazorat ostida ehtiyojmandlarga yetkazib berilmoqda.
Xususan, 4-may holatiga kelib tushgan 162 tonna un, 63 ming litr o‘simlik yog‘i, 108 ming dona tuxum, 58 tonna shakar, 212 tonna guruch, 43 tonnadan ziyod go‘sht va go‘sht mahsulotlari, 40 bosh qoramol va 100 bosh qo‘y, qariyb 330 tonna sabzavot, shuningdek, 32,5 tonnadan ziyod boshqa mahsulotlar, kiyim-bosh, ko‘rpa-to‘shak, gigiyena vositalari va har xil uy-ro‘zg‘or buyumlari manzilli tarzda aholiga tarqatilmoqda.
Avvalroq Bosh prokuratura Sardoba bo‘yicha jinoyat ishi qo‘zg‘atilgani, tergov harakatlarini DXX olib borishini ma’lum qilgandi.
Izoh (0)