Sirdaryo viloyatida suv toshqinidan aziyat chekkan aholini qutqarish ishlarida vertolyotlardan ham foydalanilmoqda. Bu haqda Telegram’dagi @aviaspotter va “Novosti Tashkentskogo Nebo” kanallari xabar berdi.
Qayd etishlaricha, O‘zbekiston harbiy-havo kuchlarining harbiy ekipajlari Sirdaryo viloyatining Sardoba suv ombori to‘g‘oni yorilib ketgan hududiga birinchilardan bo‘lib yetib borgan.
“H215M Super Puma va H125M Fennec vertolyotlari uchuvchilarining professionalizmi sharofati bilan FVV xodimlari uylar tomi va yetib borish qiyin bo‘lgan hududlarda qolib ketgan 300 dan ortiq odamni evakuatsiya qilishga muvaffaq bo‘ldi”, — deyiladi xabarda.
Avvalroq Favqulodda vaziyatlar vazirligi suv toshqinidan jabr ko‘rgan 138 kishi qutqarilgani, qutqaruv ishlarida motorli qayiqlardan foydalanilganini ma’lum qilgan edi.
Umuman, Sardoba suv ombori to‘g‘oni yorilib ketganidan so‘ng xavf hududida istiqomat qilgan 70 mingga yaqin aholi Sirdaryo viloyatining boshqa va Jizzax viloyati hududlariga ko‘chirilgan.
Suv toshqinidan jiddiy zarar ko‘rgan ikki aholi punktidan biri — “Qo‘rg‘ontepa” mahallasi raisining so‘zlariga ko‘ra, uning fermer mahalladoshi toshqin vaqti jonini xatarga qo‘yib, ikki qizaloqni suvdan chiqarib, qutqarib qolgan.
Izoh (0)