Armaniston poytaxtida mamlakat parlamenti vitse-spikeri Alen Simonyan va muxolifatchi bloger Artur Danielyan o‘rtasida mushtlashuv kelib chiqdi. “RIA Novosti”ning xabar berishicha, voqeaga doir video 29-aprel kuni Facebook ijtimoiy tarmog‘ida paydo bo‘lgan. Alen Simonyanning aytishicha, bloger haqoratlagani uchun burniga qarata boshi bilan “solgan”.
Ijtimoiy tarmoqda joylangan videoga ko‘ra, har ikkovi ham tibbiy yordamga murojaat qilgan. Huquq-tartibot organlari esa hozircha bu voqeaga hech qanday izoh bermagan.
Vitse-spiker Facebook’dagi videomurojaatida blogerni Yerevanda uchratib qolib, u bilan so‘rashgani, lekin bunga javoban uning onasini uyatli va kurakda turmaydigan so‘zlar bilan haqoratlab ketganini aytgan.
“Shundan so‘ng uning oldiga kelib u haqda ham xuddi shunday fikrda ekanligini aytib boshim bilan burniga qarata urdim”, — degan Simonyan va voqea paytida uning raqiblari uch kishi bo‘lganini qo‘shimcha qilgan. Vitse-spikerning aytishicha, keyin kichik mushtlashuv kelib chiqqan unga tan jarohati yetkazilgan.
“Shunday javob qaytarishga to‘g‘ri kelganidan afsusdaman, lekin haqoratni eshitmaganga olib o‘tib ketolmasdim… Menimcha, o‘rnimda boshqa har qanday erkak bo‘lganida bu vaziyatda boshqacha yo‘l tutmagan bo‘lardi. Men davlatning mansabdor shaxsi ekanligimni bilaman, lekin bu kimdir birovning oddiy salomiga bunday javob berishga haqqi borligini bildirmaydi. Bunda muammo ko‘rmayapman va qilmishimga yarasha javobgarlikka tayyorman”, — degan u.
Xabarda aytilishicha, mamlakatning sobiq adliya vaziri voqea jarayoni xususiy kompaniya kuzatuv kameralariga tushib qolgani va politsiya tomonidan olib qo‘yilganini ma’lum qilgan.
Hodisa ommaviy rezonansga sabab bo‘lganini hisobga olgan holda, “jamiyatning haqiqatni bilish huquqi” tergov siridan ustunligini aytib, videoni zudlik bilan jamoatchilikka oshkor qilishni talab qilgan.
Ma’lumot uchun, Danielyan davlat harakatlarini keskin tanqid qiluvchi “Adekvad” muxolifatchi partiyaga rahbarlik qiladi.
Izoh (0)