Innovatsion rivojlanish vazirligi tashabbusiga ko‘ra, Project Managers korxonasining yosh dasturchilari tomonidan koronavirus pandemiyasini yuqtirgan bemor bilan muloqotda bo‘lganlarni aniqlash jarayonini avtomatlashtirish maqsadida “Birga yengamiz” nomli mobil ilova yaratildi. Bu haqda 27-aprel kuni AOKAda o‘tkazilgan brifingda vazirlik rasmiysi ma’lum qildi, deb xabar berdi “Daryo” muxbiri.
Vazirlik axborot xizmati rahbari Nazokat Abduqunduzova mazkur ilova vazifasi xususida gapirib berdi.
“Android va iOS qurilmalar uchun mo‘ljallangan ushbu ilovaning asosiy vazifasi — bemor bilan yaqin masofada va muayyan vaqt aloqada bo‘lgan shaxslarni aniqlash, zarur hollarda ularni karantinga joylab, virusni yanada keng tarqalishining oldini olishdir. Bunda odamlar o‘z ishlariga, karantingacha bo‘lgan davrdagi hayot tarzlariga qaytsalar-da, ularning kim bilan qachon, qayerda va qancha vaqt mobaynida uchrashganlari haqida ma’lumotlar qayd etib boriladi. Agar biror kim kasallansa, u 14 kun davomida uchrashgan odamlarni topish hamda ularni karantinga qo‘yish mumkin bo‘ladi.
Barchaga ma’lumki, COVID-19 virusini tashuvchilarda kasallik alomatlari bo‘lmasa-da, ular bemalol kasallikni boshqalarga yuqtirishi mumkin. Tahlillarga ko‘ra, dunyo bo‘yicha ushbu kasallikka chalingan bemorlarning yarmi aynan kasallik tashuvchilardan virusni yuqtirib olgan. Shu bois ham bu ilovadan istaganlar emas, balki butun aholi foydalanishi talab etiladi.
Oksford universiteti olimlarining ta’kidlashicha, aholining kamida 60 foizi mazkur ilovalardan foydalansagina, u natija beradi. Hozirda Singapur, Janubiy Koreya, Tayvan kabi mamlakatlarda bunday ilovalar o‘z samarasini ko‘rsatib kelmoqda. Buni OAVda “onlayn karantin” yoki “raqamli karantin” deb ham atashmoqda. Ayni paytda olimlarimiz yaratgan mazkur ilovani PlayMarket va AppStore platformalarida joylashtirish bo‘yicha muzokaralar olib borilmoqda”, — dedi Abduqunduzova.
Izoh (0)