“O‘zgidromet”ning xabar berishicha, 27-aprel kuni bu yilgi aprelning eng issiq kuni bo‘ldi, kun o‘rtasida havo 34 darajagacha, janubda va cho‘l zonasida esa 37 darajagacha isidi. Faqat respublikaning shimoliy tumanlariga navbatdagi nam havo oqimi kirdi.
Kechga borib Qoraqalpog‘iston Respublikasi hamda Xorazm viloyatining ayrim joylarida yomg‘ir yog‘ib, momaqaldiroq bo‘lishi kutilmoqda. Harorat boshqa joylarga qaraganda pastroq, 23-28 daraja atrofida bo‘ladi. 27-aprel kuni kechasi va 28-aprel kuni ertalab respublikaning shimoliy tumanlarida yomg‘ir davom etadi, shuningdek, Buxoro va Navoiy viloyatlarida ham yomg‘ir yog‘ishi kutilmoqda.
28-aprel, seshanba kuni, kunduzi yog‘ingarchilik zonasi respublikaning markaziy va janubiy hududiga ko‘chadi. 28-aprel kuni kunduzi va 29-aprel kuni Toshkent, Samarqand, Jizzax, Sirdaryo, Qashqadaryo va Surxondaryo viloyatlarida vaqti-vaqti bilan yomg‘ir yog‘adi momaqaldiroq bo‘lishi mumkin.
28-aprel kuni ayrim joylarda shamolning tezligi sekundiga 15-20 metrgacha kuchayishi mumkin. Farg‘ona vodiysi viloyatlarida 29-aprel kechga borib yomg‘ir va momaqaldiroq bo‘lishi mumkin. Respublika hududi bo‘ylab bosim ko‘tariladi, harorat esa pasayadi va 29-aprelda 20-25 darajani tashkil qiladi.
30-aprel va 1-may kuni butun O‘zbekiston hududida ob-havo yog‘ingarchiliksiz bo‘ladi, 2-mayda esa ikki kunlik tanaffusdan so‘ng respublikada yana yomg‘ir yog‘ishi mumkin. Bu kunlarda harorat 23-28 daraja atrofida bo‘ladi.
Ma’lumot uchun, eng issiq yillarda Toshkentda aprel oyi oxirida havo harorati 34-35 darajagacha ko‘tarilgan, 2006-yil 27-aprelda esa 36,4 darajani tashkil qilib, aprel haroratining mutlaq rekordiga erishgan.
Izoh (0)