Қамаши туман ҳокимлиги «Қўшкапа» маҳалласида 7 минг аҳолига хизмат кўрсатаётган кўприк таъмиридан воз кечганини билдирди. Ҳокимликка кўра кўприк таъмири кутилган натижани бермайди. Шу боисдан ҳам туман ҳокимлиги ва вилоят раҳбарияти таъмирлаш ишларини бошламаган.
«Ушбу кўприк бир неча ойдан буён маҳаллий аҳолини ташвишга солиб келаётгани рост. ‘Қўшкапа’да жойлашган ушбу кўприкни дастлаб таъмирлаш режалаштирилган эди. ‘Равшан зар’ шўъба хўжалик жамияти билан 420 миллион сўмлик шартнома ҳам тузилганди. Бироқ иш жараёнида маълум бўлдики, ушбу кўприкни таъмирлаш кутилган натижани бермас экан. Янги лойиҳа асосида янги кўприк қурилиши керак деган хулосага келинди. Кўпчиликни кўприкнинг кейинги тақдири қандай бўлиши қизиқтиради. Шахсан мен учун ҳам кўприкнинг мустаҳкам, замонавий бўлиши жуда муҳим», — дейди ушбу ҳолатга аниқлик киритиб, Қамаши тумани ҳокимининг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари Қурбон Ҳайдаров.
Ҳозирда вилоят ҳокимлиги томонидан Вазирлар Маҳкамасига инқирозга қарши курашиш жамғармаси ҳисобидан Қамаши тумани «Қўшкапа» маҳалла фуқаролар йиғинидаги кўприкни қайта қуриш таклифи берилгани маълум қилинди.
«Шунингдек, таклифда 1 миллиард 575 миллион сўмлик лойиҳа назарда тутилган», — дейилади Қамаши тумани ҳокимлиги ахборот хизмати маълумотида.
Эслатиб ўтамиз, мазкур кўприк бетони 2019 йилнинг сентябрь ойида силжиб, фойдаланиш учун хавфли ҳолатга келгани учун бир ойга ёпилган эди. Қамаши ҳокими ўринбосари эса кўприк тез орада таъмирланишини айтганди. Вилоят ҳокимлиги кўприк таъмири учун камида 400 миллион сўм ажратилишини эълон қилган эди.
Мавзуга доир:
Изоҳ (0)