O‘zbekiston Prezidenti — Qurolli Kuchlar Oliy Bosh qo‘mondonining maxsus topshirig‘iga binoan joriy yilning 20-aprelidan 20-may kuniga qadar mamlakat hududi bo‘ylab maxsus taktik o‘quv mashg‘ulotlari o‘tkaziladi. Mudofaa vaziri rahbarligida va Favqulodda vaziyatlar vazirligi, Ichki ishlar vazirligi hamda Milliy gvardiya hamkorligida o‘tkaziladigan mazkur o‘quv mashg‘ulotlariga hokimliklarning obodonlashtirish boshqarmalari xodimlarini ham jalb etiladi. Bu haqda “Daryo”ga jurnalist Islomjon Qo‘chqorov ma’lum qildi.
Hamkorlikdagi mazkur maxsus taktik o‘quv mashg‘ulotlarini o‘tkazishdan ko‘zlangan asosiy maqsad aholi ko‘p to‘planadigan jamoat joylari, savdo markazlari va bozorlarda, shahar ko‘chalarida, ko‘p qavatli uylarda, mahallalarda, magistral, asosiy yo‘llar va ko‘chalarda keng masshtabda dezinfeksiya ishlarini olib borish, koronavirus infeksiyasi tarqalishining oldini olish, fuqarolar xavfsizligi, salomatligini ta’minlash hisoblanadi.
Toshkent shahrining barcha hududini qamrab olgan mazkur keng qamrovli hamkorlikdagi ko‘rgazmali taktik o‘quv mashg‘ulotiga zamonaviy maxsus texnikalar, 50 ga yaqin avto yoqilg‘i quyuvchi stansiya, 300 dan ortiq dezinfeksiya apparati ajratildi. Maxsus taktik o‘quvlarini uyushqoqlik bilan o‘tkazish uchun Mudofaa vazirligining Radiatsion kimyoviy biologik muhofaza qo‘shinlari va Sanitariya epidemiologiya nazorat markazi, shuningdek, boshqa hamkor tashkilotlarning yetakchi mutaxassislaridan iborat yig‘ma batalyon tuzildi.
Asosiy mashg‘ulotlarga kirishishdan avval sektorlarga ajratilgan mazkur yig‘ma batalyon shaxsiy tarkibi tomonidan hududlarda dezinfeksiya ishlarini sifatli olib borish bo‘yicha zarur ko‘rsatma va yo‘l-yo‘riqlar amalda namoyish etildi.
Mashg‘ulotlar davomida butun dunyo tajribasidan kelib chiqib, gipoxlorid natriy, bioaktiv xlor, super xlor, Javil-D kabi dori vositalari aralashmasidan kimyoviy suyuqlikni tayyorlashda e’tibor qaratish lozim bo‘ladigan muhim jihatlar ham inobatga olinmoqda. Mazkur kimyoviy aralashma o‘z tarkibida 50 foiz aktiv xlorni saqlaydi. Bu esa barcha turdagi zararli viruslarni yo‘q qilish imkonini beradi.
Ushbu maxsus taktik o‘quv mashg‘ulotlari respublikaning barcha hududlarida harbiy okruglar qo‘mondonlari boshchiligida o‘tkaziladi.
Avvalroq Harbiy xizmatni o‘tashga yuborilishi kechiktirilgan chaqiriluvchilar dezinfeksiya ishlarida ishtirok etgani haqida xabar berilgan edi.
Izoh (0)