Ohangarondagi vaqtinchalik karantin postlarining birida Cobalt’da ichki ishlar xodimi kiyimida bo‘lgan haydovchi YPX inspektorlari bilan suhbatda podpolkovnik unvoni borligini aytib, ularni aldab harakatni davom ettirishga urindi. Bu haqda Toshkent viloyati IIBB axborot xizmati xabar qilgan.
Haydovchi avvaliga podpolkovnik unvoni borligi, o‘zi avval IIV tizimida ishlagani haqida gapirib, YPX xodimlarini aldashga uringan, keyinroq ust kiyimini mashinasiga yechib qo‘yib, qo‘riqlash xizmatini ko‘rsatayotgan xususiy firmada ishlashini vaj qilib, boshqa yo‘l bilan huquq-tartibot vakillarini ishontirishga harakat qilgan.
Xabarga ko‘ra, fuqaro ichki ishlar bo‘limiga olib borilganida, uning qo‘riqlash xizmatlarini ko‘rsatuvchi MChJda faoliyat yuritishi ma’lum bo‘lgan. Cobalt’dan esa IIV xodimlarining kakardasi taqilgan dala bosh kiyimi, PR-73 rusumli rezina tayoq va uning g‘ilofi, qo‘lbola usulda yasalgan nyuchaki urish moslamalari ashyoviy dalil sifatida rasmiylashtirib olingan.
Bo‘limdagi suhbat davomida haydovchi o‘zi YPX xodimlariga ko‘rsatgan guvohnomasida “podpolkovnik” unvoni borligi haqida yozilganligidan bexabar bo‘lgan, qo‘riqlash xizmati formasini esa yaqin kunlarda boshqacharoq shaklda qayta tikilishini bildirgan.
Ohangaron shahar ichki ishlar bo‘limi huzuridagi tergov bo‘linmasi tomonidan mazkur holat yuzasidan surishtiruv ishlari olib borilmoqda.
Mavzuga doir:
Avvalroq Namanganda ichki ishlar xodimining pogoni va ko‘krak nishonini yulib otgan deputatga jinoyat ishi qo‘zg‘atilgani, Captiva’da o‘yinchoq avtomatini maqtangan Londonda tahlis oluvchi 20 yoshli yigitning kechirim so‘ragani, Toshkentda karantin vaqtida YPX inspektoriga bo‘ysunmagan Captiva haydovchisi daraxtga borib urilgani, Samarqandda o‘qotar quroli bilan maqtangan fuqaroning 12 sutkaga qamalgani hamda Buxoroda transportdan foydalanish huquqini beruvchi maxsus ruxsatnomani qalbakilashtirgan haydovchiga jinoyat ishi qo‘zg‘atilgani haqida xabarlar berilgan.
Izoh (0)