Davlat statistika qo‘mitasi negizida O‘zbekiston Milliy statistika qo‘mitasi tashkil etiladi. Bu haqda muhokamga qo‘yilgan Prezident qarori loyihasida so‘z boradi.
Hujjatga ko‘ra, Milliy statistika qo‘mitasi barcha davlat idora va tashkilotlaridan mustaqil bo‘ladi va o‘z faoliyati to‘g‘risida bevosita Prezident va bosh vazirga hisobot beradi.
Shuningdek, qo‘mita idoraviy ma’lumotlar bazalariga to‘sqinliksiz kirish, shu jumladan, ularning o‘zaro integratsiyasi orqali kuzatuvlar, tahlillar va rasmiy statistika materiallarini shakllantirish huquqiga ega bo‘ladi.
Mamlakatda statistika tizimini isloh qilishning ustuvor yo‘nalishlari hujjatda belgilab qo‘yilgan:
- statistika organlarining faoliyatini sifatli va ishonchli statistikani shakllantirishga, statistik ma’lumotlarning shaffofligi va oshkoraligini oshirishga qaratilgan professional mustaqil xizmatga aylantirish;
- axborot-kommunikatsiya texnologiyalaridan keng foydalangan holda statistik ma’lumotlarni to‘plash, qayta ishlash, tahlil qilish, nashr etish va saqlash uchun yaxlit tizimni tashkil etish;
- ilg‘or xalqaro tajribani joriy etish orqali so‘rovlarni bosqichma-bosqich optimallashtirish, shuningdek, ro‘yxatga olish va doimiy statistik hisobotlarni namunaviy tadqiqotlar bilan almashtirish;
- foydalanuvchilar bilan o‘zaro aloqa qilish va mavjud statistik ma’lumotlardan xabardorlikni oshirish orqali statistik ma’lumotlarga bo‘lgan ishonchini oshirish.
Izoh (0)