Prezident 14-aprel kuni “Navoiy viloyatida umumiy quvvati 100 MVt bo‘lgan fotoelektrik stansiya qurish” investitsiya loyihasini amalga oshirish chora-tadbirlari to‘g‘risidagini qarorni imzoladi.
Norma’ning xabar berishicha, umumiy quvvati 100 megavattli ushbu fotoelektrik stansiyani loyihalashtirish, moliyalashtirish, qurish va ishlatish bo‘yicha tajriba-sinov loyihasini amalga oshirish uchun investor tanlab olish jarayoni yakunlandi.
Tender Jahon banki guruhi tartib-taomillariga muvofiq o‘tkazilgan va Abu Dhabi Future Energy Company PJSC – Masdar (BAA) kompaniyasi g‘olib deb topilgan. Investitsiyalar va tashqi savdo vazirligi u bilan investitsiya bitimi, “O‘zbekiston milliy elektr tarmoqlari” AJ esa elektr energiyasini sotib olish to‘g‘risida bitim tuzdi.
O‘zbekistonda investitsiya loyihasini amalga oshirish uchun loyiha kompaniyasi – investor nomidan ish yuritadigan “Nur Navoi Solar” MChJ ta’sis etildi.
Investor ishlab chiqarilgan elektr energiyasini qat’iy tarif – 1 kilovatt/soat uchun 2,679 dollar miqdorida (tarif investitsiya loyihasining butun 25 yillik muddati davomida xorijiy valyutada denominatsiyalangan) yagona xaridor – “O‘zbekiston milliy elektr tarmoqlari” AJga sotish majburiyatini oldi. To‘lov mahalliy valyutada amalga oshiriladi.
Shuningdek, arab kompaniyasi kuchlanishni oshiruvchi FES podstansiyasini qurishi va foydalanishga topshirilgandan keyin uni “O‘zbekiston milliy elektr tarmoqlari” AJga bepul asosda berishi shart.
Investor va loyiha kompaniyasining majburiyatlari 20 million dollar miqdoridagi bank kafolati bilan ta’minlanadi. “O‘zbekiston milliy elektr tarmoqlari” AJ elektr energiyasini 6 oy mobaynida sotib olishni qoplash uchun investor foydasiga xorijiy valyutada tasdiqlangan tiklanadigan akkreditiv ochadi.
Avvalroq O‘zbekistonda BAAning ushbu kompaniyasi bilan hamkorlikda shamol elektr stansiyalari qurilishi xabar berilgan edi.
Izoh (0)