AQSh G‘aznachiligi pandemiya sharoitida fuqarolarga moddiy yordam tariqasida tarqatiladigan cheklarda mamlakat prezidenti Donald Trampning ismini ko‘rsatish bo‘yicha topshiriq bergan. Bu haqda The Washington Post xabar berdi.
Har birining qiymati 1200 dollarni tashkil qiladigan cheklar 70 million amerikalikka tarqatiladi. “Prezident Donald J. Tramp” so‘zi chekning chap tomoniga tushiriladi.
Agar mazkur yozuv cheklarda chop etiladigan bo‘lsa, bu prezidentning ismi bu kabi cheklarga tushirilgan birinchi holat bo‘ladi. AQSh prezidenti administratsiyasidagi manbalarning ma’lumotlariga ko‘ra, Tramp G‘aznachilik boshlig‘i Stiven Mnuchindan cheklarni imzolashga ruxsat so‘ragan. Biroq bu AQSh qonunlariga to‘g‘ri kelmaydi. Buning o‘rniga cheklardagi “Kompensatsion iqtisodiy to‘lov” so‘zi ostida prezidentning ismi bo‘ladi.
Mazkur to‘lovlar koronavirus tarqalishi sharoitida aholini qo‘llab-quvvatlash bo‘yicha choralardan biri hisoblanadi. Oilali bo‘lmagan va yillik daromadi 75 ming dollardan oshmaydigan kishilar 1200 dollarlik chek oladi. Turmush qurgan va yillik daromadi 150 ming dollardan oshmaydigan juftliklar 2400 dollar oladi. Barcha ota-onalar 17 yoshdan oshmagan har bir farzandi uchun 500 dollardan oladi.
Mart oyining oxirida AQShda iqtisodiyot va aholini qo‘llab-quvvatlash bo‘yicha 2 trillion dollarlik choralar dasturi ma’qullandi. Unga ko‘ra, AQSh fuqarolariga o‘qish uchun to‘lovlarni kechiktirish, ishsizlik nafaqalarini oshirish taklif qilinadi, shuningdek, tibbiy muassasalar va aviatashuvchilarga moliyaviy ko‘mak ham taklif qilingan.
AQShda koronavirus tarqalishi bilan bog‘liq dunyodagi eng murakkab vaziyat yuzaga kelgan. Jons Hopkins universiteti ma’lumotlariga ko‘ra, AQShda koronavirusga chalinganlar soni 609 ming kishidan oshgan. Mamlakatda so‘nggi bir sutkada koronavirus qurbonlari soni bo‘yicha kunlik antirekord yangilandi — bir sutkada 2,2 mingdan ortiq bemor vafot etdi.
Avvalroq Donald Tramp Jahon sog‘liqni saqlash tashkilotini moliyalashtirishni to‘xtatishini ma’lum qilgani hamda uning bu qarori Yevropa Ittifoqi, BMT, Xitoy va Germaniya tomonidan qoralangani haqida xabarlar berilgandi.
Izoh (0)