Chili hukumati koronavirusdan vafot etganlar haqidagi statistikani kasallikdan tuzalganlar haqidagi raqamlarga qo‘shib yuborgani ma’lum bo‘ldi. Sababi koronavirusdan vafot etganlar ham “endi kasallanmayotgan bemorlar” ro‘yxatiga kiradi. Bu haqda mamlakat sog‘liqni saqlash vaziri Xayme Manalich ma’lum qilgan, deb xabar bermoqda Newsweek.
“Bizda 898 nafar bemor koronavirus bilan kasallanmayapti, ular boshqalar uchun infeksiya tashuvchisi emas va biz ularni tuzalganlar safiga qo‘shib hisoblaymiz. Ular karantinda 14 kun davomida o‘tirgan va ushbu oraliqda vafot etgan fuqarolardir”, – deya Chili hukumati vakilining so‘zlarini keltirgan nashr.
Chili hukumatining ushbu statistikani qachondan boshlab shunday yuritayotgani haqida ham ma’lumot yo‘q. Xalqaro statistikani yuritayotgan tashkilotlar ham Chili davlat organlari bergan ma’lumotlar asosida hisobot tayyorlagan.
Jons Hopkins universiteti bergan ma’lumotda 15-aprel holatiga ko‘ra, Chilida 7,9 ming nafar odam koronavirus yuqtirib olgan, 92 nafar odam undan vafot etgan va 2,3 ming nafar kishi COVID-19 infeksiyasidan tuzalgan.
Izoh (0)