“O‘zbekiston Respublikasida xalq tabobatini rivojlantirishga doir qo‘shimcha chora-tadbirlar to‘g‘risida” Prezident qarori qabul qilindi, deb xabar bermoqda Adliya vazirligi matbuot xizmati.
Qarorga muvofiq, 2020-yil 1-maydan davlat muassasasi shaklidagi yuridik shaxs maqomiga ega Respublika xalq tabobati ilmiy-amaliy markazi (Respublika markazi) hamda tibbiyot OTMlari va Abu Ali ibn Sino nomidagi Jamoat salomatligi texnikumlarida yuridik shaxs maqomiga ega bo‘lmagan Xalq tabobatini rivojlantirish markazlari (Hududiy markazlar) tashkil etiladi.
Mavzuga doir: O‘zbekistonda tibbiyot kollejlari Ibn Sino nomidagi salomatlik texnikumlariga aylantiriladi
Respublika markazi SSVning tashkiliy tuzilmasiga kiradi va unga vazirlik tomonidan Vazirlar Mahkamasi bilan kelishilgan holda lavozimga tayinlanadigan va lavozimidan ozod etiladigan direktor rahbarlik qiladi.
Hududiy markazlarda o‘qitish sog‘liqni saqlash vaziri tomonidan tasdiqlangan o‘quv rejalari va dasturlari bo‘yicha pullik asosda amalga oshiriladi, o‘qitish qiymatining miqdori Respublika markazi tomonidan belgilanadi.
Hududiy markazlarning bitiruvchilariga xalq tabobati bo‘yicha malaka oshirganlik to‘g‘risida rasmiy hujjat deb tan olinadigan belgilangan shakldagi sertifikat beriladi.
Xalq tabobati bo‘yicha mutaxassislarni tayyorlash kurslarini muvaffaqiyatli tamomlagan tibbiy ma’lumotga ega bo‘lmagan shaxslarga Vazirlik tomonidan tasdiqlanadigan shakldagi xalq tabobatining tegishli yo‘nalishlarida faoliyat olib borish huquqini beruvchi guvohnoma beriladi.
2020-yil 1-maydan tuman (shahar), viloyat va Respublika darajasidagi davlat ko‘p tarmoqli tibbiyot muassasalarida hamda nodavlat tibbiyot tashkilotlarida xalq tabobati xonalari ochiladi.
“O‘zbekiston Respublikasida xalq tabobatini rivojlantirishga doir qo‘shimcha chora-tadbirlar to‘g‘risida” Prezident qarorining to‘liq matni bilan quyidagi havola orqali tanishish mumkin.
Izoh (0)