10-aprel kuni Fitch Ratings xalqaro reyting agentligi O‘zbekistonning suveren kredit reytingi bo‘yicha navbatdagi hisobotini e’lon qildi. Unga ko‘ra, O‘zbekistonning suveren kredit reytingi “BB-” (“Barqaror”) darajasida saqlab qolindi.
Fitch Ratings’ning ta’kidlashicha, COVID-19 pandemiyasi tufayli yuzaga kelgan global inqiroz sharoitlarida O‘zbekiston reytingining saqlab qolinishiga asosiy omillar mamlakatda mustahkam tashqi va fiskal zaxiralarning mavjudligi, diversifikatsiyalangan tovarlar eksporti bazasi hamda tashqi moliyaviy manbalardan foydalanish imkoniyatlari hisoblanadi.
Fitch Ratings prognoz qilishicha, O‘zbekiston iqtisodiyoti 2020-yilda 2 foizga o‘sadi. Kelgusi yilda bu sur’at 6,8 foizga yetadi. Bunda hozirdagi inqirozga qarshi choralar, yosh ishchi kuchi, yuqori investitsiya, islohotlarning davom ettirilishi hamda asosiy hamkorlarning (Rossiya, Xitoy) tezroq oyoqqa turib olishi muhim rol o‘ynaydi.
Davlat qarzlari YaIMga nisbatan 34,3 foizga yetadi, 2019-yilda bu ko‘rsatkich 28,5 foiz edi. O‘zbekiston tiklanish va taraqqiyot jamg‘armasining salkam 20 millard dollarlik aktivlari, jumladan, xalqaro zaxiralarning 37,7 foiz — 11 millard dollari pul mablag‘laridan, 57 foizi Markaziy bankning monetar oltindan iborat ekanligi ham tashqi qarz va fiskal siyosatning moslashuvchanligini ta’minlaydi.
Konsolidatsiyalangan budjet defitsiti 2020-yilda YaIMga nisbatan 4,2 foizga yetishi mumkin. Fitch Ratings islohotlardan chetlashish, makroiqtisodiy muvozanatning buzilishi hamda makroiqtisodiy barqarorlik uchun xatarlarni oshiradigan nomaqbul choralar, koronavirus pandemiyasining YaIMning o‘rta muddatli o‘sishi yoki davlat moliyasiga o‘ta kuchli salbiy ta’sir ko‘rsatishi hamda valyuta zaxiralarining pasayishi yoki tashqi qarz majburiyatlarining keskin o‘sishini O‘zbekiston reytingiga salbiy ta’sir ko‘rsatuvchi omillar sifatida ko‘rsatib o‘tgan.
Ma’lumot uchun, COVID-19 pandemiyasining iqtisodiyotga salbiy ta’siri tufayli agentlik bir necha suveren kredit reytinglarni yoki prognozlarni pasaytirdi. O‘tgan haftaning o‘zida, Janubiy Afrika Respublikasi, Kolumbiya, Ummon hamda Nigeriyaning reytinglari pasaytirildi.
Eslatib o‘tamiz, 2019-yilning yozida nufuzli xalqaro reyting agentliklaridan biri Fitch Ratings Toshkentga ilk bor barqaror progonozli “BB-” suveren kredit reytingini taqdim etgan edi.
Izoh (0)