Yangi BMW M5 avtomobilining egasi avtosalondan uzoqlashishga ulgurmay boshqa bir mashina bilan yo‘l-transport hodisasini sodir etdi. Zarba shu qadar kuchli bo‘lganidan mashina yo‘ldan chiqib ketib, ustunga borib urilgan. Bu haqda Karachi Track’ning Facebook’dagi sahifasida xabar berildi.
Guvohlarning so‘zlariga ko‘ra, nemis sedanini qayta tiklab bo‘lmaydi.
Yo‘l-transport hodisasi erkak mashinani dilerlik markazi darvozasidan haydab chiqqanidan bir necha daqiqa o‘tgach sodir bo‘lgan. YTH joyidagi suratlarga ko‘ra, M5’ning old va yon qismi pachoq bo‘lgan. Agarda mashina egasi o‘z BMW’sini sug‘urta qilishga ulgurgan bo‘lsa, pul to‘liq qaytarilishi mumkin.
Haydovchining o‘zi ushbu holatga izoh bermagan.
BMW M5 modeliga 625 ot kuchiga ega 4,4 litrli V8 dvigateli o‘rnatilgan. Avtomobil 100 km/soat tezlikka chiqishi uchun 3,3 soniya yetarli, maksimal tezligi esa 250 km/soat. Ma’lumotlarga ko‘ra, M5 modelining narxi 108 ming dollar atrofida.
Avvalroq AQShda yangi Chevrolet Corvette xarid qilinganidan bir kun o‘tib YTHga uchragani haqida xabar berilgandi.
Izoh (0)